З інтэрнатаў ССНУ Берасцейскай вобласці знікаюць падлеткі

Цяпер у вышуку знаходзяцца юнак з баранавіцкага ліцэя і студэнтка каледжа ў Ляхавічах.

У міліцыю 10 снежня звярнуўся майстар аднаго з ліцэяў Баранавічаў, піша «Брестская газета». Мужчына паведаміў, што 7 снежня пад 15.40 з інтэрната сышоў 17-гадовы навучэнец. Аб яго месцазнаходжанні педагогам нічога не вядома. Падлетка шукаюць не першы раз.

Аналагічны выпадак адбыўся 9 снежня ў Ляхавічах. У мясцовае РАУС звярнулася выхавальніца інтэрната аграрнага каледжа. Праваахоўнікам яна распавяла аб знікненні 16-гадовай навучэнкі. Першакурсніца сышла з інтэрната 9 снежня пад 16.20. Дзе яна можа знаходзіцца, невядома.

Варта адзначыць, што з Ляхавіцкага каледжа знікаюць студэнты не ўпершыню. У верасні больш за два тыдні шукалі першакурсніцу гэтай навучальнай установы.

Аналагічны выпадак меў месца ў верасні і ў Берасці. Міліцыя займаецца вышукам зніклых падлеткаў.

Дарэчы, у Расеі сярод падлеткаў набірае папулярнасць страшны флэш-моб. Як паведамляюць расейскія СМІ, падлеткі знікаюць на дзень, каб выклікаць паніку сярод родных. Яны не адказваюць на званкі і паведамленні. Паводле правілаў гульні, падлетак павінен правесці 24 гадзіны без грошай, ежы і вады і ні з кім не камунікаваць.