«Не пакідаў Воршу, але пры гэтым быў у калоніі пад Тамбовам»

Беларус з ліста даведаўся, што адседзеў у Расеі.

Жыхар Воршы Аляксандр Ліцвінаў не меў праблем з законам, у аўтабіяграфіі заўсёды смела пісаў: «не судзімы, не прыцягваўся», піша tut.by. І раптам даведаўся, што ён... адседзеў за крадзеж у калоніі пад расейскім Тамбовам. Пра гэта ён атрымаў афіцыйны ліст з тамтэйшага суда. Мужчына вельмі хоча зразумець, як такое магло адбыцца. Адная з версій - ягонае імя ды іншыя звесткі выкарыстаў невядомы зламыснік. Але як яму ўдалося абвесці вакол пальца суд у Расеі? У гэтым Аляксандру цяпер дапамагае разабрацца Генпракуратура Беларусі.

У верасні гэтага года ў паштовую скрыню дома на вуліцы Сямёнава ў Воршы, дзе пражывае 36-гадовы Аляксандр Ліцвінаў з жонкай Аленай, прыйшоў ліст з расейскім штэмпелем. Яго выявіла жонка.

Маладая жанчына са здзіўленнем даведалася, што ейны муж, высвятляецца, учыніў крадзеж і судзімы ў суседняй краіне. Патэлефанавала Аляксандру: «Што наогул адбываецца?». Той - у шоку. У той час, калі нейкі Аляксандр Ліцвінаў у Расеі быў узяты пад варту (у лістападзе 2017 года), потым з'яўляўся фігурантам крымінальнай справы, а затым сядзеў у турме, жыхар Воршы з такім жа імем і прозвішчам хадзіў на працу ў сваім горадзе, жыў у ім і нікуды надоўга не выязджаў.

Аляксандр і Алена падумалі: розыгрыш сяброў. Пасмяяцца. Але ліст - тры старонкі з тэкстам пастановы раённага суда горада Кірсанава Тамбоўскай вобласці, з афіцыйнымі пячаткамі і подпісамі — ніяк не падобны да жарту.

У пастанове паведамляецца, што ураджэнец Воршы Аляксандр Ліцвінаў 28 лютага 2018 года асуджаны за крадзеж, учынены з прычыненнем значнай шкоды, і выкраданнем або пашкоджанне дакументаў, штампаў, пячатак альбо выкраданне акцызных марак, спецыяльных марак ці знакаў адпаведнасці. За гэта Дамадзедаўскі гарадскі суд Маскоўскай вобласці ў сукупнасці злачынстваў прызначыў яму 1 год пазбаўлення волі ў калоніі-пасяленні ў горадзе Кірсанаве пад Тамбовам.

Асуджаны Ліцвінаў А. В. звярнуўся ў райсуд горада Кірсанава Тамбоўскай вобласці з хадайніцтвам аб прывядзенні вышэйпаказанага прысуду ў адпаведнасць са зменамі, якія ўнеслі ў КК Расеі ў ліпені 2018 года. І суд задаволіў яго, залічыўшы ў тэрмін пазбаўлення волі амаль 4 месяцы, пакуль той знаходзіўся пад вартай.

Пастанова ўвайшла ў законнае дзеянне 3 верасня. Неўзабаве яна прыйшла на пошту жыхару Воршы Аляксандру Ліцвінаву. І цяпер ён ламае галаву: як стаўся датычным да ліхтуг нейкага чалавека пад ягоным прозвішчам у расейскіх судах і калоніі?

- У лісце цалкам падаюцца звесткі пра мяне — імя, прозвішча, імя па бацьку, хатні адрас у Воршы, дата нараджэння, грамадзянства Беларусі. Гэта значыць усё, акрамя пашпартных звестак — кажа Аляксандр Ліцвінаў. - Хтосьці папросту выкарыстаў маё імя - выдаў сябе за мяне, падмануў расейскі суд. Я наважыў адшукаць праўду ў гэтай сітуацыі, і ў гэтым мяне падтрымлівае жонка, якую таксама абурыла, што я «судзімы». Я звяртаўся ў міліцыю, у суды, да адвакатаў. І ўсе ў шоку: як такое можа быць? Як гэта так: старонні чалавек прыйшоў і назваўся маім імем? Чаму не высветлілі асобу майго «двайніка» - спачатку падчас следства (ён быў пад вартай чатыры месяцы), потым на судзе? Бо можна было зрабіць запыт у Беларусь, і падман выявіўся б.

Здагадак, хто гэта мог быць, у Аляксандра Ліцвінава няма:

- У мяне шмат сяброў у Маскве, але ўсе яны былі навідавоку. Каб з іх нехта паўгода сядзеў у турме, такога няма. Можа, гэта старонні чалавек, якога я не ведаю. А можа, і знаёмы. Вось я і хачу гэта высветліць. Што за «двайнік» такі? Хацелася б паглядзець яму ў вочы.

Судзімасць, атрыманая ў суседняй краіне, на жыцці Аляксандра пакуль ніяк не адбівалася:

- Па Беларусі я свабодна хаджу: ва ўсіх базах - гэта ўжо праверылі - я «чысты», ніколі не быў судзімы. Але ў Расею цяпер мне ехаць страшна. Усякае можа быць. А мне праблемы ў суседняй краіне не патрэбныя. Шмат часу сыходзіць на паходы па судах, на высвятленне гэтай сітуацыі.

Аляксандр працуе аўтаслесарам на СТО «Віраж» у Воршы. Тут яму выдалі даведку, што ён наведваў працу без пропускаў і быў на працоўным месцы ў сваім горадзе з 10 лістапада 2017 года (з дня, калі «двайніка» арыштавалі) да 16 сакавіка 2018 года (у гэты дзень прысуд у дачыненні да асуджанага за крадзеж увайшоў у дзеянне).

Аляксандр Ліцвінаў звярнуўся па дапамогу ў Генеральную пракуратуру Беларусі.

29 лістапада ведамства адправіла ў Генпракуратуру Расеі заяву жыхара Оршы «у пытанні магчымага неправамернага выкарыстання яго персанальных звестак пры разглядзе ў лютым 2018 года Дамадзедаўскім гарадскім судом Маскоўскай вобласці крымінальнай справы паводле абвінавачвання Ліцвінава А. В. паводле п. «в» ч. 2 арт. 158, ч. 5 арт. 325, ч. 2. 69 КК РФ».

«Са сцвярджэнняў заяўніка, інкрымінаваных яму дзеянняў ён не чыніў, на тэрыторыі Расейскай Федэрацыі падчас асуджэння і знаходжання пад вартай («двайніка» -заўвага) не знаходзіўся. Аўтар мяркуе, што выкарыстанне ягоных персанальных звестак зроблена невядомай асобай, асабовыя звесткі якой не былі належным чынам выяўленыя праваахоўнымі органамі Расейскай Федэрацыі», — гаворыцца ў звароце Генпракуратуры Беларусі.