Bloomberg: Сі Цзіньпін падчас візіту ў Еўропу спрабаваў убіць клін паміж ЕЗ і ЗША

Але ягоны план праваліўся.

Лідар Кітая Сі Цзіньпін падчас свайго візіту ў Еўропу спрабаваў раскалоць кантынент і ўбіць клін паміж ЗША і ЕЗ. Пра гэта паведамляе РБК-Украіна са спасылкай на Bloomberg.

Выданне паказвае, што візіт Сі Цзіньпіна ў Францыю мала што яму прынёс, аднак больш прадуктыўнымі сталіся яго візіты ў Сербію і Вугоршчыну.

- Хоць Сі казаў аб неабходнасці пазбегнуць новай халоднай вайны, яго дыпламатыя адрадзіла рознагалоссі мінулай вайны, нацкаваўшы Усход Еўропы на Захад, - пішуць журналісты.

Лідар Кітая хацеў забіць клін паміж ЗША і ЕЗ

Кіраўнік Францыі Макрон спадзяваўся, што, устанавіўшы больш цесныя асабістыя сувязі, ён зможа пераканаць кітайскага лідара паўплываць на дыктатара Пуціна, каб пакласці канец вайне Расеі супраць Украіны. Аднак Сі не моцна змяніў пазіцыю Кітая.

Прэзідэнтка Еўрапейскай камісіі Урсула фон дэр Ляен таксама адзначыла экзістэнцыйны характар вайны, але Сі Цзіньпін паспрабаваў даць адпор і заклікаў не крытыкаваць Кітай праз вайну ва Украіне.

Bloomberg піша, што Сі мог спадзявацца ўбіць клін паміж ЗША і Еўразвязам, але наўрад ці яму гэта ўдалося. Урсула фон дэр Ляен пазней сказала, што ЕЗ гатовы выкарыстоўваць усе даступныя інструменты, каб даць адпор несправядлівай гандлёвай практыцы Кітая.

Кантакты з Вугоршчынай

Падчас візіту ў Вугоршчыну Сі Цзіньпін абвясціў пра шэраг новых інвестыцый у гэту краіну. Пры гэтым ён спрабаваў паказаць, што Вугоршчына з’яўляецца мадэллю таго, як могуць выглядаць стасункі Еўрапейскага Звязу з Кітаем.

Выданне піша, што ўраду Вугоршчыны бракуе фінансавання, таму краіна спрабуе ўсякімі спосабамі знайсці новыя стымулы для сваёй эканомікі.

Паводле слоў міністра замежных спраў Вугоршчыны Петэра Сіярта, сярод падпісаных пагадненняў з Кітаем - грошы на дарагую мадэрнізацыю старой чыгуначнай сеткі краіны і будаўніцтва даўно адкладзеных злучэнняў паміж аэрапортам Будапешта і цэнтрам сталіцы. Вугоршчына таксама будзе імкнуцца да паглыблення супрацоўніцтва з Huawei для прасоўвання цыфравізацыі ў краіне.

Пры гэтым журналісты ўдакладняюць, што гэта не першая спроба Кітая раскалоць ЕЗ. У 2012 годзе Пекін стварыў механізм для ўмацавання сувязей з 16 краінамі Цэнтральнай і Усходняй Еўропы, але пасля гэтая ініцыятыва прыйшла ў заняпад.

Пазіцыя Сі Цзіньпіна наконт вайны ва Украіне

Лідар Кітая не выступіў з асуджэннем Расеі, а наадварот, паглыбіў сувязі паміж краінамі пасля ўварвання РФ ва Украіну. Аднак Сі Цзіньпін выступае за больш хуткае заканчэнне вайны і для гэтага Кітай прыдумаў свой «мірны план».

Учора прэм'ер-міністр Вугоршчыны Віктар Орбан пасля сустрэчы з Сі Цзіньпінам заявіў, што яго краіна падтрымлівае так званы «мірны план» Кітая для заканчэння вайны ва Украіне.