Азаранцы з сынам забаронена пакідаць Лос-Анджэлес

Судовая цяжба тэнісісткі з амерыканскім бацькам дзіцяці доўжыцца з ліпеня 2017 года.

Вікторыя Азаранка не можа пакідаць з сынам Лос-Анджэлес, бо бацька дзіцяці падаў апеляцыю на пастанову суда прызнаць тэнісістку асноўным апекуном над сынам Леа. Пра гэта паведамляе Pressball.by са спасылкай на кіраўніка Беларускай тэніснай федэрацыі Сяргея Цяцерына.

Раней у ЗША зацвердзілі пастанову беларускага суда, які прызнаў Азаранку асноўным апекуном над сынам. У бацькі дзіцяці Білі было тры тыдні, каб абскардзіць пастанову. Ён у гэты тэрмін уклаўся, і цяпер маецца разгляд апеляцыі па сутнасці. На час разгляду апеляцыі Вікторыі забаронена выязджаць з сынам за межы Лос-Анджэлеса.

Судовая цяжба Азаранкі з амерыканскім бацькам дзіцяці доўжыцца з ліпеня 2017 года. З таго часу Вікторыя прапускае ўсе буйныя турніры і рассталася з трэнерамі Майклам Джойсам і Эшканам Рэзазадэ.

Апошнім прапушчаным стаў турнір у Досе, дзе ёй быў выдзелены wild card.

31 студзеня Вікторыя Азаранка паведаміла, што выступіць на турніры WTA ў амерыканскім Індыян-Уэлсе (5-18 сакавіка), арганізатары якога далі ёй wild card. Азаранка была пераможцай гэтых спаборніцтваў у 2012 і 2016 гадах.

У канцы студзеня таксама стала вядома, што асабістым трэнерам Вікторыі Азаранкі стане Вячаслаў Конік