Прах Магдалены Радзівіл перапахавалі на тэрыторыі менскага касцёла на Залатой Горцы

На ўрачыстасць прыбылі Мацей і Міхал Радзівілы.

Прах мецэнаткі беларускага адраджэння пачатку XX стагоддзя княгіні Магдалены Радзівіл перапахавалі на тэрыторыі касцёла Найсвяцейшай Тройцы (св.Роха) на Залатой Горцы ў Менску, паведамляе БелТА.

Напярэдадні урна з прахам Магдалены Радзівіл была выстаўлена для развітання ў касцёле Найсвяцейшай Тройцы. Прах перапахавалі ў левай частцы храма. На тым месцы цяпер устаноўленая памятная табліца і барэльеф у гонар знакамітай мецэнаткі. Пахавальную цырымонію ўзначаліў дапаможны біскуп Менска-Магілёўскай архідыяцэзіі Юрый Касабуцкі. На ўрачыстасць таксама прыбылі Мацей і Міхал Радзівілы, праўнучка Магдалены Радзівіл - Марылена Замойская.

Пра намер сваякоў перапахаваць Магдалену Радзівіл у Менску ў 2016 годзе заявіў Мацей Радзівіл. Такое рашэнне было прынятае праўнукамі памерлай. «Яна ўважала сябе беларускай, марыла жыць у Менску, таму будзе вельмі сімвалічна, калі мы пахаваем прах Магдаліны тут», - адзначаў раней Мацей Радзівіл.

Улетку 2017 года прах княгіні Магдалены Радзівіл быў дастаўлены з Швейцарыі ў Менск і перададзены храму святога Сымона і святой Алены (Чырвоны касцёл), побач з якім у свой час яна пражывала. Дагэтуль прах знаходзіўся ў горадзе Фрыбура, размешчаным на захадзе Швейцарыі.

У 1918 годзе Магдалена Радзівіл вымушана была эміграваць з Беларусі. Жыла ў Польшчы, Літве, Нямеччыне. З 1932 года - у Фрыбуры, дзе і памерла ў 1945 г. ва ўзросце 83 гадоў.

Мецэнатка і культурная дзяячка у свой час аказвала фінансавую падтрымку выдавецтву «Загляне сонца і ў наша аконца», шпіталям, сельскім крамам і г.д. У 1917 годзе яна ахвяравала брыльянтавае калье на заснаванне беларускай грэка-каталіцкай калегіі ў Рыме. Дзякуючы яе намаганням былі адкрыты беларускія школы ў шэрагу рэгіёнаў краіны. Мецэнатка плаціла стыпендыю студэнтам-беларусам, якія вучыліся ў Пецярбургу, падтрымлівала тамтэйшую беларускую бібліятэку.