Прэзідэнт Славаччыны адмовіўся прызначаць новы ўрад

Альтэрнатыўная прапанова аб складзе ўрада павінна быць пададзеная да канца гэтага тыдня.

Прэзідэнт Славаччыны Андрэй Кіска адмовіўся прызначаць новы ўрад у тым складзе, які быў прапанаваны кааліцыяй.

Пра гэта паведамляе Aktuality.sk (пераклад - eurointegration.com.ua).

Петэр Пелегрыні, якому было даручана фармаванне новага ўрада, учора быў у прэзідэнта Кіскі і прадставіў яму спіс імёнаў, якія павінны ўвайсці ў склад кабінета.

Кіска ў аўторак паведаміў, што зноў сустрэўся з Пелегрыні і заявіў яму, што не прызначыць ўрад у цяперашнім складзе.

Прэзідэнт заклікаў Пелегрыні прадставіць новую прапанову аб чальцах будучага ўраду да пятніцы.

Нагадаем, 26 лютага ў Славаччыне застрэлілі журналіста даследчыка Яна Куцяка і ягоную дзяўчыну. Найбольш магчымым матывам забойцы праваахоўнікі ўважаюць прафесійную дзейнасць журналіста.

Калега журналіста Куцяка распавяла, што ён расследаваў выпадкі махлярства з грашыма еўрапейскіх фондаў і магчымую датычнасць да гэтага італійскага мафіёзнага клана «Ндрангета».

Прэм'ер-міністр Славаччыны Роберт Фіцо падаў у адстаўку пасля масавых пратэстаў у краіне праз забойства журналіста-даследчыка і пагрозы новых выбараў.