Чыжоўскі рынак 12-ым разам выставяць на аўкцыён

29 сакавіка Чыжоўскі рынак зноў выставяць на аўкцыён як маёмасны комплекс.

Гэта будзе ўжо 12-я спроба прадаць гандлёвы аб'ект. Што чакае рынак у будучыні піша агенцтва «Минск-Новости».

Рынак быў адкрыты ў чэрвені 1980 года. Ён займае плошчу больш за 1,5 гектара. З'яўляецца даччыным прадпрыемствам Камароўскага рынку. У прыватныя рукі Чыжоўскі рынак спрабуюць перадаць з 2012 года. З розных прычын конкурсы не прыносілі выніку, у апошнія гады - проста не было заявак на ўдзел у аўкцыёнах.

2017 год адзначыўся правядзеннем незалежнай ацэнкі рынкавага кошту прадпрыемства як маёмаснага комплексу. Ён склаў 3 мільёны 931 тысячу рублёў. А для апошняга аўкцыёну 29 сакавіка пачатковы кошт знізілі на 20%. Але гэта не дапамагло, заявак на ўдзел зноў няма.

Начальніца аддзела экспертызы дакладнасці ацэнкі дзяржаўнай маёмасці фонду «Менскгармаёмасць» Іна Меляшкевіч кажа, што рынак не стратны, а яго кошт для наступнага аўкцыёну зноў знізяць.

- Неўзабаве будзе прынятае пастанова аб зніжэнні кошту на 50%. Ён складзе 1 мільён 965 тысяч рублёў, гэта значыць прыкладна мільён даляраў. У траўні плануем правядзенне яшчэ аднаго конкурсу. А першага чэрвеня тэрмін ацэнкі Чыжоўскага рынку мінае. Пасля гэтай даты мы не зможам прадаваць аб'ект былым коштам. А калі кіраўніцтва горада прыме пастанову ў далейшым зноў выставіць яго на продаж, то ізноў пачнуцца работы паводле прыватызацыі - ацэнка, фармаванне ўмоў, узгадненне.

Начальніца аддзела гандлю і паслуг адміністрацыі Заводскага раёна Вольга Пракацень кажа, што калі аўкцыёны ні да чаго не прывядуць, то рынак рэканструююць усё роўна.

- Калі пакупнік не знойдзецца, мы ўсё роўна будзем Чыжоўскі рынак аднаўляць. За кошт самога прадпрыемства, бо яно не стратнае. Так што грошы на рэканструкцыю ёсць, на працягу двух-трох гадоў паэтапна яе зробім. Але рынак захаваем - у першую чаргу мы ўлічылі меркаванне мясцовых жыхароў.

Пракацень кажа, што зробяць нешта падобнае на рынак «Тутэйшы», што на Партызанскім праспекце. Работы пачнуць з адкрытых шэрагаў ужо гэтай вясной.

- Каб бабулі маглі прадаваць вырашчаную імі прадукцыю ў цывілізаваных умовах. Месцаў будзе блізу 80. Галоўны будынак рынку таксама зменіцца, паступова заменім там абсталяванне.