Новыя пратэсты ўспыхнулі ў Барселоне

Пратэсты пачаліся пасля арышту пяці вядучых каталонскіх палітыкаў, якія выступаюць за аддзяленне рэгіёна ад Гішпаніі.

Падчас масавых пратэстаў супраць затрымання пяці вядучых каталонскіх палітыкаў адбыліся сутыкненні з паліцыяй, у выніку пацярпелі некалькі дзясяткаў чалавек. З 20 гадзін да паўночы па медыцынскую дапамогу звярнуліся 29 чалавек, якія атрымалі лёгкія траўмы, у асноўным удары, паведаміў у ноч на суботу, 24 сакавіка, дэпартамент аховы здароўя каталонскага Жэнералітата, паведамляе Нямецкая хваля.

Пратэстоўцы спрабавалі прарваць паліцэйскі кардон ля будынка прадстаўніцтва гішпанскага ўрада ў Барселоне, кідалі дымавыя шашкі і бутэлькі. У адказ праваахоўнікі ўжылі гумовыя дубінкі.

Пратэсты супраць арышту палітыкаў

Пратэсты ў Барселоне і іншых каталонскіх гарадах пачаліся напярэдадні пасля абвяшчэння Вярхоўным судом Гішпаніі пастаноў у дачыненні да падазраваных у датычнасці да сепаратысцкага працэсу. Суд выдаў міжнародны ордэр на арышт уцекача ў Бэльгію былога каталонскага лідара Карлеса Пучдэмона і яшчэ пяці мясцовых палітыкаў, якія хаваюцца ад гішпанскага правасуддзя за мяжой. Акрамя таго, арыштаваныя пяць вядучых палітыкаў, якія выступаюць за аддзяленне Каталоніі ад Гішпаніі, у тым ліку кандыдат на пасаду кіраўніка каталонскай адміністрацыі Жорзі Туруль.

Урад Гішпаніі ў пачатку лістапада 2017 года адправіў у адстаўку каталонскую адміністрацыю і пазбавіў паўнамоцтваў рэгіянальны парламент. Нагодай паслужыла арганізацыя мясцовымі палітыкамі рэферэндуму пра незалежнасць рэгіёна і абвяшчэнне «суверэннай каталонскай рэспублікі». Канстытуцыйны суд у Мадрыдзе прызнаў такія дзеянні незаконнымі.

Пучдэмон хаваецца за мяжой

Адначасова судовыя органы Гішпаніі распачалі справы супраць 28 каталонскіх палітыкаў за мяцеж, растрату бюджэтных сродкаў і іншыя правапарушэнні. Карлес Пучдэмон, кіраўнік распушчанай адміністрацыі, якому пагражае да 50 гадоў пазбаўлення волі, схаваўся за мяжой. Раней ВС Гішпаніі ўжо выдаваў ордэр на арышт Пучдэмона, але затым адклікаў яго.

Пераможцамі пазачарговых парламенцкіх выбараў у Каталоніі, што адбыліся 21 снежня, зноў аказаліся прыхільнікі яе незалежнасці. Яны настойваюць на аднаўленні звольненай адміністрацыі на чале з Пучдэмонам.