Нікол Пашынян: Ты перамог, Горды грамадзянін Рэспублікі Арменія

Лідар народных пратэстаў пракаментаваў адстаўку Сержа Саргсяна.

«Ты перамог, Горды грамадзянін Рэспублікі Арменія», - пра гэта напісаў на сваёй старонцы ў Facebook лідар армянскай апазіцыі, дэпутат парламента Арменіі Нікол Пашынян. «І цяпер ніхто не зможа адабраць у цябе гэтую перамогу. Віншую, пераможны народ», - адзначыў Пашынян.

Нагадаем, што Серж Саргсян 23 красавіка сышоў у адстаўку з пасады прэм'ер-міністра Арменіі.

У афіцыйнай заяве Саргсян прызнаў, што пакідае сваю пасаду праз вулічныя акцыі пратэсту.

Масавыя мітынгі, дэманстрацыі і шэсці, пачынаючы з 13 красавіка, праводзіў рух «Мой крок» на чале з кіраўніком парламенцкай фракцыі блока «Елк» («Выхад») Ніколам Пашынянам.

22 красавіка ў цэнтры Ерэвана прайшоў самы масавы мітынг супраць праўлення Сержа Саргсяна, у якім узялі ўдзел ад 160 да 200 тысяч чалавек.

Раніцай у панядзелак 23 красавіка масавыя акцыі пратэсту ва ўсёй Арменіі прадоўжыліся, у Ерэване да іх далучыліся вайскоўцы з брыгады міратворцаў і іншых частак.