Уладзімір Клічко выступіць у складзе ўкраінскага рок-гурта

Легенда сусветнага бокса прадэманструе свае здольнасці ўдарніка.

15 красавіка Уладзімір Клічко выступіць у незвычайным амплуа, піша telegraf.com.

У межах канцэрту Закарпацкага гурта «Rock-H», які адбудзецца ў кіеўскім Docker Pub, легенда сусветнага бокса прадэманструе свае здольнасці ўдарніка. Уладзімір сядзе за ўдарную ўстаноўку і зайграе дзве кампазіцыі гурта, якія яму асабліва спадабаліся.

Менавіта барабаны з'яўляюцца ўлюбёным музычным інструментам украінца. У яго доме для ўдарнай устаноўкі збудавалі адмысловы гукаізаляваны пакой, дзе Клічко можа граць, не замінаючы родным.

Уладзімір пазнаёміўся з творчасцю «Rock-H» пару гадоў таму, а не так даўно Закарпацкі рок-гурт нават наведаў музей дасягненняў Клічко, дзе, мяркуючы з усяго, хлопцы і дамовіліся аб такім незвычайным экспэрыменце.