Бізнэс-супольнасць супраць пашырэння гандлёвых сетак

Дзель буйных сетак у агульным тавараабароце прадуктаў харчавання Беларусі ўжо перасягае 70%.

Агульная кансультатыўная рада пры Мінэканомікі выказалася супраць таго, каб даць магчымасць адной гандлёвай сетцы павялічыць сваю прысутнасць у пэўным рэгіёне з 20 да 35%.

Пра гэта пасля пасяджэння рады газеце «Белорусы и рынок» распавяла дырэктарка Бізнэс звязу прадпрымальнікаў і наймальнікаў імя прафесара М.С.Куняўскага Жанна Тарасевіч.

Пазаўчора гэтую ідэю не падтрымала і грамадска-кансультатыўная рада пры МАРГ. «У нас шмат гандлёвых сетак, і ніводная з іх, акрамя той, якая прасоўвае такую пастанову, не займае больш за 10% на рэгіянальных рынках, таму не бачым мэтазгоднасці нешта мяняць у гэтым», - працытаваў «БР» кансалідаваную пазіцыю рады адзін з яе чальцоў.

Нагадаем, напачатку тыдня пра сваю нязгоду з ідэяй падвысіць парогавае значэнне дзелі суб'екта гандлю ў аб'ёме раздробнага тавараабарачэння харчовых тавараў у адпаведных адміністрацыйна-тэрытарыяльных адзінках, пры дасягненні якой ён не мае права на далейшае павелічэнне гандлёвых плошчаў, заявілі ўсе вядучыя бізнэс-звязы краіны. Ліст з аргументацыяй быў накіраваны ў МАРГ.

На думку экспэртаў бізнэс-асацыяцый, ініцыятары прапановы аб падвышэнні парогавага значэння не падалі сур'ёзных абгрунтаванняў неабходнасці такой пастановы. «Таксама адсутнічае ацэнка, якая рэгулюе ўздзеяння наступстваў ад падвышэння парогавага значэння, у тым ліку якім чынам гэта адаб'ецца на стане канкурэнтнага асяроддзя ў тых ці іншых рэгіёнах, на ўзроўні коштаў для канчатковых спажыўцоў, на ўзроўні паступлення падаткаў у мясцовыя бюджэты, на ўзроўні развіцця малога і сярэдняга прадпрымальніцтва як у гандлёвай сферы, так і ў сферы вытворчасці і аптовага гандлю прадуктамі харчавання», - гаворыцца ў лісце бізнэс-звязаў.

Паводле ацэнак аналітыкаў бізнэс асацыяцый, дзель буйных сетак, якія маюць больш за 20 крам, у агульным тавараабароце прадуктаў харчавання краіны ўжо перасягае 70%. «Гэта значыць, нават устанаўленне парогавага значэння на 20% не з'яўляецца абмежавальным чыннікам для імклівага павелічэння дзелі буйных сетак у тавараабарачэнні краіны ў апошнія гады», - канстатуецца ў лісце.

Яго аўтары выказваюць устурбаванасць тым, што ў многіх раённых цэнтрах Беларусі дзель адной буйной сеткі ўжо перавысіла заканадаўча ўстаноўленыя 20% у агульным тавараабарачэнні і гэта прывяло «да масавага закрыцця гандлёвых аб'ектаў суб'ектаў МСП, Белкаапсаюза, зніжэння паступленняў у мясцовыя бюджэты».

«З улікам прыбытку афіляваных структур дзель адной буйной сеткі ў шэрагу раёнаў перасягае 45-50% агульнага тавараабарачэння прадуктаў харчавання, - сцвярджаюць экспэрты бізнес-звязаў. - Існая структура раздробнага гандлю прадуктамі харчавання негатыўным чынам уплывае на стан канкурэнтнага асяроддзя на многіх рынках у Рэспубліцы Беларусь, развіццё малога і сярэдняга прадпрымальніцтва, фінансавы стан вытворцаў і перапрацоўшчыкаў прадуктаў харчавання».

У выпадку падвышэння парогавага значэння з цяперашніх 20% да прапанаваных 35% сітуацыя стане яшчэ горшай. «З улікам вышэйпададзенага катэгарычна супраць», - падкрэсліваецца ў лісце. Яго падпісалі Мінскі сталічны звяз прадпрымальнікаў і працадаўцаў, Рэспубліканская канфедэрацыя прадпрымальніцтва, Беларускі звяз прадпрымальнікаў, Бізнэс звяз прадпрымальнікаў і наймальнікаў імя прафесара М.С.Куняўскага, Беларуская навукова-прамысловая асацыяцыя. Ініцыятарам змен выступіла адная з буйных гандлёвых сетак краіны - ТАА «Еўрагандаль».