«Дзяцей-інвалідаў у Газэлі прывязваюць шалікамі, а выканкам купляе Qashqai»

«Сацыяльная дзяржава» ў дзеянні.

У пачатку 2018 года інтэрнэт-парталы Беларусі публікавалі інфармацыю аб куплі Пружанскім райвыканкамам новага Nissan Qashqai за 51,6 тысяч рублёў. Пасля скаргі жыхаркі горада Пружаны дзяржкантроль знайшоў парушэнні заканадаўства аб дзяржзакупках, піша abw.by.

Нагадаем: у мінулым верасні Пружанскі райвыканкам абзавёўся новым Nissan Qashqai за 51,6 тысяч рублёў у камплектацыі з поўным прывадам. Па выпадковым супадзенні гэта адбылося незадоўга да старту продажу беларуска-кітайскага аўтамабіля Geely Atlas.

Але больш за ўсё мясцовую жыхарку абурыла тое, што дарагая купля адбылася на фоне адсутнасці спецыяльнага аўтобуса для дзяцей-інвалідаў, які патрэбны ў мясцовым дзіцячым цэнтры карэкцыйна-развівальнага навучання і рэабілітацыі.

Дарэчы, пра праблему браку спецыяльнага транспарту для дзяцей-інвалідаў у канцы мінулага года пісаў часопіс "Имена".

Журналісты звязаліся з жыхаркай Пружанаў Вікторыяй Анохавай-Жураўлёвай, якая падала скаргу ў дзяржкантроль:

"Мяне абурыла, што такія дарагія аўтамабілі, прычым не беларускай вытворчасці, купляюць ва ўмовах, калі сацыяльная сфера ў Пружанах цалкам запушчаная. Дайшло да таго, што дзяцей-інвалідаў у звычайнай Газэлі прывязваюць шалікамі, каб яны не падалі, бо адмысловага аўтобуса для іх няма.

Дагэтуль пішуць адпіскі, што робяць усё магчымае для куплі спецыяльнага транспарту. "Грошай няма, але вы трымайцеся". Абяцаюць купіць аўтобус у 2019 годзе. Затое на новенькі Nissan Qashqai сродкі чамусьці хутка знайшліся яшчэ ў 2017 годзе.

Прычым што Qashqai, што спецыяльная Газэль для інвалідаў-вазочнікаў каштуюць прыкладна аднолькава. А машыны ў аўтапарку ў іх ёсць. Патрэбы жыхароў райвыканкам наогул мала цікавяць. У прыватным сектары дагэтуль няма ходнікаў, не кажучы ўжо пра веласіпедныя дарожкі. У зімовы перыяд ліхтары рана адключалі ў мэтах эканоміі, пешаходы хадзілі ў поцемках. Набыццё дарагога аўтамабіля з парушэннямі - гэта толькі вяршыня айсберга".

У сваім звароце жыхарка Пружан пыталася, наколькі законна і абгрунтавана Пружанскі райвыканкам пры набыцці службовага легкавога аўтамабіля выкарыстаў бюджэтныя сродкі.

У выніку Дзяржкантроль выявіў парушэнні заканадаўства аб дзяржзакупках. Так, службовыя асобы райвыканкама пры апісанні прадмета дзяржаўнай закупкі пазначалі канкрэтныя гандлёвыя маркі, а таксама характарыстыкі прадмета закупкі, цалкам супадаюць з адпаведнымі характарыстыкамі аўтамабіля Nissan Qashqai (які і быў набыты па выніках закупкі).

"Аналагічныя парушэнні Камітэтам выяўленыя і пры праверцы Кобрынскага райвыканкама. Вінаватыя асобы прыцягнуты Камітэтам да устаноўленай заканадаўствам адказнасці", - гаворыцца ў афіцыйным паведамленні.

А чыноўнікі Пружанскага райвыканкама відавочна неабыякавыя да аўтамабіляў маркі Nissan. Мы ўжо пісалі пра тое, што ў верасні мінулага году яны аб'яўлялі тэндар на куплю Nissan Terrano або яго аналага. Сярод патрабаванняў - поўны прывад, аўтаматычная каробка перадач і вялікі спіс опцый. А дзяцей-інвалідаў прывязваюць шалікамі...