У Беларусі ў красавіку зноўку выраслі запасы малочнай прадукцыі

Толькі за адзін месяц запасы выраслі на 42,4%.

Беларускія перапрацоўнікі малака нарошчваюць выпуск сухіх прадуктаў, вытворчасць масла і сыру скарачаецца. У красавіку было выпушчана 14,1 тысячы т сухіх малака і вяршкоў, што на 24,3% больш, чым год таму. За чатыры месяцы іх выпуск вырас на 14,8% да 49,6 тысячы т, піша сайт «Беларусы і рынак».

Рост вытворчасці сухіх прадуктаў заканамерна прывёў да павелічэння іх запасаў на фоне непаразуменняў з Расеяй з нагоды паставак прадукцыі гэтай катэгорыі. За красавік запасы выраслі на 42,4% да 17,7 тысячы т. Цяпер яны амаль у 1,5 разу большыя за сярэднямесячныя аб'ёмы вытворчасці.

Выпуск сметанковага масла скараціўся ў красавіку на 4,7% да 9,7 тысячы т. Летась вытворчасць была асабліва актыўнай на фоне высокіх коштаў і попыту. 9,7 тысячы т – паказчык, блізкі да сярэдніх шматгадовых аб'ёмаў вытворчасці. Усяго з пачатку года было выраблена 37,5 тысячы т масла, або на 3,2% менш, чым год таму. Запасы масла за красавік павялічыліся на 23,6% да 12,8 тысячы т. Яны ў 1,4 разы большыя, чым сярэднямесячныя аб'ёмы вытворчасці. Адпаведна, у красавіку экспарт масла не выйшаў на ўзроўні 7-8 тысяч т.

Вытворчасць сыру ў красавіку склала 15,6 тысячы т, што на 5,6% менш, чым год таму. Агулам за чатыры месяцы яна знізілася на 2,2% да 62,1 тысячы т. Запасы сыру за красавік выраслі на 14,7% да 12,6 тысячы т. Яны складаюць 81,1% ад сярэднямесячнага аб'ёму вытворчасці.

У красавіку было выраблена 6 тысячы т згушчанага малака. Яго выпуск скараціўся на 32,8% у параўнанні з красавіком мінулага года. Усяго за студзень-красавік 2018 года перапрацоўнікі вырабілі 29,8 тысячы т згушчаных малака і вяршкоў, або на 6,6% менш, чым год таму. Запасы гэтай прадукцыі павялічыліся на 8,7% да 3,1 тысячы т, што складае 43,2% ад сярэднямесячнага аб'ёму.

Вытворчасць натуральнай малочнай прадукцыі ў красавіку была на 2,1% большай, чым год таму. Яна склала 155,3 тысячы т у пераліку на малако. З пачатку года вытворчасць вырасла на 7,3% да 651,7 тысячы т.

Беларускія перапрацоўнікі значна скарацілі выпуск нятлустай малочнай прадукцыі. Ён упаў на 41,4% да 8 тысячы т у пераліку на абястлушчанае малако ў красавіку, а з пачатку года скараціўся на 33,1% да 42,8 тысячы т.