Генеральны сакратар NATO ўсклаў на Расею адказнасць за гібель рэйса MH17

Столтэнберг назваў Расею адной з самых вялікіх праблем бяспекі для краін NATO.

Генеральны сакратар NATO Енс Столтэнберг заклікаў Расею ўзяць на сябе адказнасць за катастрофу пасажырскага самалёта рэйса MH17 на Данбасе. Падзенне лайнера стала прамым следствам агрэсіі Расеі супраць Украіны, заявіў кіраўнік альянсу ў панядзелак, 28 траўня, у Варшаве, паведамляе DW.

Столтэнберг назваў «усё больш напорыстую» Расею адной з самых вялікіх праблем бяспекі для краіны NATO, адзначае агенцтва dpa. Расея ўмешваецца ў дэмакратычныя працэсы, нясе адказнасць за кібератакі і паказала, што гатова выкарыстоўваць вайсковую сілу супраць суседа, адзначыў Столтэнберг. З ягоных слоў, NATO будзе супрацьстаяць гэтым выклікам, спалучаючы палітычны дыялог і вайсковае стрымліванне.

24 траўня Міжнародная следчая група на прэс-канферэнцыі ў галандскім Утрэхце абвясціла, што ўстаноўка «Бук», з якой была запушчана ракета, якая збіла ў ліпені 2014 гады над Данбасам пасажырскі самалёт малайзійскай авіякампаніі, знаходзілася на ўзбраенні 53-й зенітнай ракетнай брыгады расейскіх узброеных сіл. Масква ўсе гады, якія прайшлі пасля трагедыі, якая забрала 298 чалавечых жыццяў, адхіляе ўсе абвінавачанні Міжнароднай следчай групы.