Беларускіх школьнікаў адзенуць у форму ад «Беллегпрама»

Яфімчык распавёў, як бацькам можна замовіць форму ў адзіным стылі для вучняў школ.

Старшыня канцэрна «Беллегпрам» Мікалай Яфімчык у эфіры праграмы «Неделя» на канале СТВ распавёў, як бацькам замовіць форму ў адзіным стылі для вучняў школ, паведамляе БелТА.

З ягоных слоў, каб замовіць школьную форму ў адзіным стылі для канкрэтнай школы, трэба звярнуцца ў «Беллегпрам» ці на любое прадпрыемства канцэрна (якое спецыялізуецца на пашыве школьнай формы - Заўвага.). «Мы раскажам, з кім трэба пасупрацоўнічаць, каб зрабіць замову. Яна будзе выкананая ў любой колькасці, памерах і колеравай гаме», - паведаміў кіраўнік ведамства.

Пры гэтым ён адзначыў, што зрабіць замову формы яшчэ не позна. Тэхналагічны цыкл вытворчасці нармальнага касцюма пры наяўнасці гатовай тканіны складае 60 дзён.

Мікалай Яфімчык паінфармаваў, што на працягу апошніх гадоў прадпрыемствы канцэрна вырабляюць блізу 1 млн. вырабаў школьнай формы. Прычым усе яны рэалізуюцца. Акрамя таго, на прапанову канцэрна цэлы шэраг школ ужо працуюць над індывідуальнай формай. Прадпрыемствы «Беллегпрама» гатовыя працягваць гэтую працу і ў далейшым.

Старшыня канцэрна таксама дадаў, што ўсе прадпрыемствы галіны маюць патрэбу ў мадэрнізацыі, нягледзячы на тое, што многія з іх ужо правялі тэхнічнае пераўзбраенне. «Калі мы не будзем трымаць тую планку, якую патрабуе спажывец, то выпадзем з рынку. Таму гэтая тэма заўсёды актуальная: за апошнія чатыры гады мы асвоілі больш за $500 млн на мадэрнізацыю. І гэта работа будзе прадоўжаная», - рэзюмаваў Мікалай Яфімчык.