Берасцеец прымусіў «Алмі» зняць расейскі сцяг са службовага аўто

Алесь Ляўчук вядзе перапіску з «Алмі» ўжо два гады.

Пры гэтым работнікі кампаніі «Юніфуд», якой належыць гандлёвая сетка «Алмі», прадэманстравалі дрэннае веданне законаў і беларускай мовы, паведамляе «Белсат».

Незалежны журналіст Алесь Ляўчук вядзе перапіску з «Алмі» ўжо два гады, але гэтым разам афіцыйны адказ уразіў журналіста.

«Такое пачуццё, што адказ кампанія «Юніфуд» пісала ўсёй фірмай, кожны аддзел па абзацу. Другі момант – навошта спрабаваць адкрыта хлусіць у афіцыйным адказе? На здымку выразна відаць, што расейскі сцяг прымацаваны на лабавым шкле, а гэта парушэнне артыкула 18.12 КоАП РБ. Няхай прыхільнікі «расейскага свету» запомняць, што ў Беларусі з расейскімі сцягамі і георгіеўскімі стужкамі ездзіць нельга», – тлумачыць сітуацыю Алесь Ляўчук.

Летась журналіст папрасіў «Алмі» спыніць гандляваць крадзеным, калі ўбачыў расейскі сцяг каля крымскіх вінаў. Афіцыйнага адказу ён не атрымаў, але зварот падзейнічаў. Крама хоць і не адмовілася ад продажу вінаў, але зняла ўсе таблічкі аб прыналежнасці Крыма да Расеі.

«Як бачым іх хапіла на год. Беларусы знаходзяцца пад шквалам расейскай прапаганды і не разумеюць, да чаго можна прывесці на першы погляд бяскрыўдны расейскі сцяг на аўто. Ва Украіне гэта прывяло да расейскай агрэсіі, і я не хачу, каб так было ў Беларусі. Таму буду прасіць розныя структуры прыбіраць расейскія сцягі з аўто, бо ім там не месца», – кажа журналіст.

Пры ўсей сур’ёзнасці сітуацый, да якіх прыводзіць расейская прапаганда, у Беларусі ніводная арганізацыя, куды звяртаўся Ляўчук, не адмовіліся зняць расейскі сцяг ці георгіеўскую стужку з аўто. Ты не менш за гэта некаторым структурам давялося заплаціць штраф.