Павел Севярынец даў уладальнікам рэстарацыі ў Курапатах тры дні на закрыццё ўстановы
- 15.07.2018, 12:59
- 10,604
Абаронцы ўрочышча гатовыя бясплатна яго дэмантаваць і перанесці.
Сустаршыня аргкамітэта ў стварэнні партыі «Беларуская хрысціянская дэмакратыя», адзін з актыўных абаронцаў урочышча Курапаты Павел Севярынец даў тры дні на закрыццё і перанос рэстарацыі «Паедзем паядзім» яго ўладальнікам, паведамляе tut.by.
У адваротным выпадку, заявіў Севярынец у тэлефоннай размове з адным з саўладальнікаў увечары 14 ліпеня, «мы павінны размаўляць пра тыя бандыцкія паводзіны, якія ў вас ёсць».
«У вас ёсць тры дні на тое, каб прыняць рашэнне выводзіць гэту рэстарацыю з тэрыторыі Курапатаў. Мы гатовыя як абаронцы Курапатаў дапамагчы вам бясплатна яе перанесці, г.зн. дэмантаваць і перанесці. Разумееце, гэта апошняя прапанова, і яна дзейнічае тры дні... Не, мы пагрозы не будзем рабіць. Я вас проста папярэджваю. Гэта прапанова дзейнічае тры дні, пасля гэтага мы будзем размаўляць па-іншаму з вамі. Вось і ўсё», - сказаў палітык.
З ягоных слоў, зямля для будаўніцтва рэстарацыі была атрыманая незаконным шляхам. «Мы з вамі гэта ведаем», - сказаў Севярынец саўладальніку ўстановы.
Увечары 14 ліпеня ля ўезду ў рэстарацыйны комплекс аўтамабіль на расейскіх нумарах збіў актывіста «Еўрапейскай Беларусі» Леаніда Кулакова.