Spiegel: Пажар у Берліне не закрануў вытворчасць IRIS-T

Днём 3 траўня ў раёне Ліхтэрфельдэ Берліна загарэўся завод Diehl.

Пажар на заводзе абаронна-прамысловага канцэрна Diehl у Берліне не закрануў працэс вытворчасці сістэмаў супрацьпаветранай абароны IRIS-T, якія ўлады Нямеччыны сярод іншага пастаўляюць Украіне, паведамляе Spiegel са спасылкай на крыніцы ў кампаніі.

У Diehl Group удакладнілі, што завод у Берліне займаецца гальванізацыяй, гэта значыць пакрыццём металам іншых металічных вырабаў, напрыклад для аўтамабільнай прамысловасці. Сістэмы СПА IRIS-T вырабляе іншае прадпрыемства кампаніі – Diehl Defence, якое ў Берліне мае толькі офісны філіял.

Днём 3 траўня ў раёне Ліхтэрфельдэ Берліна загарэўся завод Diehl. Пажар пачаўся ў тэхнічным памяшканні на першым паверсе будынка, загаранне тушылі больш за сотню пажарных. Яны папярэдзілі, што ў будынку ёсць хімічныя рэчывы, у тым ліку цыянід медзі і серная кіслата, у сувязі з чым павялічваецца рызыка забруджвання паветра.