20 кастрычнiка 2018, Субота, 6:04
Нам патрэбна ваша дапамога
Рубрыкі

Жыхары берасцейскіх інтэрнатаў шакаваныя новымі рахункамі

10
ІЛЮСТРАЦЫЙНАЕ ФОТА

Для адных жыхароў плата вырасла амаль удвая, іншыя заплацілі прыкладна ўтрая больш, чым раней.

За чэрвень жыхарам інтэрнатаў налічылі не толькі плату за жыллёва-камунальныя паслугі, але і за карыстанне жылым памяшканнем. «Брестская газета» даведалася, на колькі вырасла аплата рахункаў трох розных берасцейскіх інтэрнатаў, якія знаходзяцца на балансе КУП «ЖРЭУ Берасця».

З 17 рублёў да 30

Берасцейка Ганна пражывае ў маленечкім пакоі інтэрната на 6,35 "квадрата", агульная плошча, якую яна аплачвае, складае 10,68 кв метра. Калі да ўвядзення платы за карыстанне жылым памяшканнем яна плаціла за асноўныя жыллёва-камунальныя паслугі крыху больш за 17 рублёў, то за чэрвень сума да аплаты ў ейным рахунку павялічылася без малога да 30 рублёў. І гэта пры тым, што сума за ЖКП у яе ў сувязі з памяншэннем спажывання атрымалася на 2 з лішнім рублі меншая, чым у папярэднім месяцы.

Інтэрнат, у якім пражывае Ганна, аднеслі да першай катэгорыі, у выніку за карыстанне няпоўнымі 11 метрамі блока ёй давялося заплаціць 14,39 рубля.

«У мяне ніяк не палепшыліся ўмовы пражывання, заробак таксама не павялічыўся, - патлумачыла дзяўчына. - Таму думаю, што плаціць больш даводзіцца незразумела за што».

З 47 рублёў да 85

У Вікторыі пакой - 18 кв метраў, агульная плошча жылля – 30 метраў. За травень яна заплаціла 47 рублёў, а за чэрвень пакой у інтэрнаце першай катэгорыі каштаваў ёй 85 рублёў.

«Пры маім фактычна мінімальным заробку гэтая сума проста непад'ёмная, - наракае Віка. - Інтэрнат ў 1994 годзе атрымала ад завода, іншага жылля няма. Куды высяляцца? На вуліцу? Сваякі за трохпакаёвую кватэру плацяць менш, чым я за пакой у інтэрнаце».

Жанчына распавяла, што на тэлевізіі выступаў нейкі работнік ЖРЭУ, які пра рахункі ў інтэрнаце сказаў: «Вы арандуеце жылую плошчу ў інтэрнаце». Але дамова арэнды ўкладаецца толькі з юрыдычнай асобай, з фізічнай асобай можа быць толькі дамова найму.

«У мяне ёсць дамова найму жылога памяшкання, якую я прачытала ўздоўж і поперак, але нідзе не знайшла пункта аб тым, што з мяне могуць утрымліваць дадатковыя сумы, - здзіўляецца Вікторыя. - У адпаведнасці з ёй я абавязаная аплачваць толькі камунальныя паслугі. Камунальнік на ТВ казаў ёй пра тое, што плата за карыстанне ўведзеная, каб сабраць грошы на рамонт інтэрнатаў. Атрымліваецца, як у байцы Крылова пра «Ваўка і ягня», якое вінаватае толькі ў тым, што Ваўку хочацца есці. Тады ў мяне сустрэчнае пытанне: на якія патрэбы выдаткоўваюцца сумы, якія з жыхароў інтэрнатаў бяруць за тэхнічнае абслугоўванне і на капітальны рамонт?»

Яна дадала, што грошы паводле гэтых артыкулаў жыхары плацілі і плацяць, але пры гэтым у месцах агульнага карыстання не робіцца нічога. Усё, што выйшла са строю, жыхарам інтэрната мяняць даводзіцца за свае грошы.

З 35 рублёў да 92

Свае 42 кв метры жылой плошчы Іна атрымала шмат гадоў таму, працуючы на прадпрыемстве, якому тады гэта інтэрнат належаў. Аплачвае яна не толькі іх, але і яшчэ 11 метраў дадатковых, якія знаходзяцца па-за парогам яе жытла. Такім чынам, агульная плошча складае 53 «квадраты». Асноўныя ЖКП і дадатковая (агульная антэна на даху) каштавалі летам менш за 35 рублёў. З чэрвеня да гэтай сумы дадалася плата за карыстанне жылым памяшканнем, у выніку плата за інтэрнат перавысіла 90 рублёў і склала блізу траціны заробку Іны.

«Больш за 20 гадоў жыву ў інтэрнаце, які жыхары называюць «кашары», бо яму ў абед 100 гадоў, - не хавала эмоцый Іна. - Вядома, за гэты час у самім жытле за ўласныя грошы я зрабіла добры рамонт. Бо жыццё ж праходзіць, а хочацца жыць у нармальных умовах. А ў нашым інтэрнаце на агульных кухнях дапатопныя электрапліты, зламаныя вентылі ў ракавінах не мяняюцца гадамі, душавыя з іржавымі «гусаком», аблупленыя сцены на лесвічных пляцоўках. Між іншым, мы ўсе гэтыя «выгоды» з 2002 года, калі ўвялі тэхабслугоўванне, аплачваем дадаткова. Калі за гэты час што і змянялася ў месцах агульнага карыстання, то толькі па дробязях».