Восем відаў «суперзброі» Расеі і Кітая, якіх можна не баяцца

Прапаганда выдае жаданае за сапраўднае.

Сусветная гонка ўзбраенняў не думае спыняцца, вынаходзяцца ўсё новыя віды ваеннай тэхнікі, кожны з якіх, на думку стваральнікаў, можа змяніць поле бою. Уся гэтая звышдакладная і звышмагутная зброя не мае аналагаў у свеце, а яшчэ і каштуе непрыстойна шмат. Партал BusinessInsider апублікаваў падборку найноўшай зброі Расеі і Кітая, якой, верагодна, не варта баяцца.

«Буравеснік»

Расейская ракета «Буравеснік» з неабмежаваным радыусам тэарэтычна можа ўразіць любую мэту на тэрыторыі праціўніка, таму што можа абысці самыя сучасныя сістэмы супрацьракетнай і супрацьпаветранай абароны.

Ці варта баяцца гэтай зброі? Відавочна, не. Таму што самы доўгі палёт гэтай ракеты – 35 км, потым над «Буравеснікам» быў страчаны кантроль і ён разбіўся. Самы кароткі палёт – амаль восем кіламетраў цягам чатырох секундаў.

5-е пакаленне з Кітая

Кітайскія знішчальнікі J-31 і J-20, паводле задумы іх стваральнікаў, павінны скласці годную канкурэнцыю амерыканскім нябачнікам пятага пакалення F-35 і F-22. Але гэтага пакуль не адбылося – кітайцы так і не здолелі стварыць магутны і надзейны рухавік, які неабходны іх знішчальнікам для вядзення паветранага бою.

Дзякуючы дальнабойных ракетам кітайскія нябачнікі могуць атакаваць з вялікіх адлегласцяў лётныя танкеры, якія выкарыстоўваюцца для дазапраўкі ў паветры амерыканскай авіяцыі, але на гэтым усё.

У манеўраным баі на малых і сярэдніх дыстанцыях J-31 і J-20 саступаюць F-22, на далёкіх дыстанцыях таксама – засячы кітайскія машыны, у тым ліку дзякуючы састарэлым рухавікам з вялікай цеплавой прыкметнасцю, знішчальнікам лёгка.

Т-14 «Армата»

Найноўшы расейскі танк здольны знішчыць M1 Abrams. Магутная 125-мм прылада, аўтаматычная падача боепрыпасаў, сістэма дынамічнай абароны «Афганіт», здольная збіваць варожыя снарады і ракеты – усё гэта вельмі страшна, калі б не адно але. Т-14 «Армата» – неймаверна дарагі танк.

Ягоны кошт настолькі высокі, што Мінабароны Расеі да гэтага часу не прыняло пастановы пра масавыя закупкі Т-14 «Армата». Замест гэтага было пастаноўлена мадэрнізаваць існыя баявыя машыны – Т-90, Т-80, Т-72.

«Бумеранг» і «Курганец-25»

Найноўшыя расейскія баявыя машыны «Бумеранг» і «Курганец-25» ніяк не могуць дабрацца да серыйнай вытворчасці, якая першапачаткова была прызначаная на 2017–2018 гады. З тых часоў яна неаднаразова пераносіцца, і доўжыцца гэта дагэтуль. Прычына даволі простая – у Расеі, паводле наяўнай інфармацыі, не стае грошай на ўсе навінкі ВПК.

Нагадаем, што «Бумеранг» – гэта перспектыўная колавая платформа сярэдняй вагавой катэгорыі, на базе якой створаная баявая машына пяхоты К-17. Абарону БМП забяспечвае шматслаёвае браняванне з утрыманнем керамікі.

«Курганец-25» мае масу блізу 25 тон і можа разганяцца да 80 км/г, у якасці ўзбраення ўсталяваны баявы модуль «Эпоха» (30-мм аўтаматычная гармата; 7,62-мм кулямёт і ПТРК «Карнет»).

Кітайскі палубны знішчальнік J-15

Знішчальнік J-15 – аснова кітайскай ваенна-марской авіяцыі, але ягоныя баявыя характарыстыкі невысокія. Сам знішчальнік – гэта копія савецкага Су-33, доследны асобнік якога – Т10К-7 – быў набыты Кітаем ва Украіны і грунтоўна вывучаны.

J-15, якія ўсталяваныя на авіяносцы «Ляанін», саступаюць амерыканскаму F-18 паводле велічыні максімальнай узлётнай вагі. Да таго ж самалёт пакутуе на шматлікія адмовы абсталявання.

Су-57

Расейскі Су-57 роўны F-22, лепшы за F-35 і можа ўжываць крылатыя ракеты «Кінжал», здольныя нанесці сур'ёзныя страты тэхніцы і інфраструктуры спаборніка. Аднак Расея пакуль не набывае гэтыя самалёты ў вялікіх колькасцях і не выпускае серыйна.

Але Су-57 не таму не ўяўляе вялікай пагрозы.

А таму, што не ўсё так добра з гэтым самалётам. Індыя, якой Расея дапамагала распрацоўваць уласны стэлс пятага пакалення FGFA, выйшла з праграмы і зацікавіліся амерыканскімі самалётамі.

Асноўныя прэтэнзіі індыйцаў былі ў тым, што расейцы не здолелі выканаць патрабаванні ўзроўню незаўважнасці FGFA і забяспечыць самалёт надзейнай сілавой устаноўкай.

Суперавіяносец Расеі

Крэмль плануе пабудаваць суперавіяносец («Шторм»), які будзе крыху пераўзыходзіць амерыканскія авіяносцы тыпу Nimitz і мець падобныя баявыя магчымасці.

Але ўсё адно гэты карабель будзе саступаць найноўшаму амерыканскаму авіяносцу CVN-78 Gerald R. Ford і ўвогуле наўрад ці будзе пабудаваны. Рэч у тым, што з развалам СССР на стапелях быў разабраны савецкі цяжкі авіяносец «Ульянаўск».

Разам з ім былі страчаныя тэхналогіі пабудовы такіх караблёў, а спецыялісты, якія былі з імі знаёмыя, былі звольненыя і ў большасці сваёй страцілі неабходныя навыкі.