Нараджэнка Беларусі стала найлепшай гумарысткай у амерыканскім Сэнт-Луісе
1- 22.07.2018, 10:59
- 7,839
У сваім выступе беларуска паказала нумар пра сваіх бацькоў.
Ціна Дыбаль, якая нарадзілася ў Беларусі, а цяпер жыве ў ЗША ў штаце Місуры, стала ўладальніцай звання «Найлепшая гумарыстка Сэнт-Луіса 2018».
Пра гэта піша выданне St. Louis Post-Dispatch.
Як паведамляе газета, конкурс быў арганізаваны Helium Comedy Club. Прычым Ціна да гэтага двойчы ўдзельнічала ў ім, але абодва разы не праходзіла далей за папярэдні этап.
А цяпер адразу перамагла, апярэдзіўшы блізу сотні чалавек. І нават здалося, што перамагла без адмысловай працы. «Гэтым разам я зрабіла так, каб усё атрымалася», – патлумачыла Дыбаль.
Цікава, што ў сваім выступе яна паказала нумар пра сваіх бацькоў. «Замежныя бацькі прыродай сваёй вельмі пацешныя», – сказала нараджэнка Беларусі.
Каб перамагчы ў конкурсе, Ціне давялося шмат працаваць. І нават не на рэпетыцыі – бо яна рэгулярна выступае на сцэнах Comedy Club у Сэнт-Луісе.
Сілы хутчэй пайшлі на рэарганізацыю наяўнага ў яе рэпертуару, каб абмежаваць сябе ў адведзеныя конкурсам часавыя рамкі.
Дыбаль занялася жанрам стэндапу ў 2014 годзе. І ў той самы час пачала вучыцца ў школе імправізацыйнай камедыі Improv Shop.
Цяпер яна дае выступы пяць вечароў на тыдзень, асабліва часта ў Funny Bone Comedy Club.
Кажучы пра свой першы выступ на сцэне, Ціна прызнаецца, што хацела б яго забыцца. «Ёсць відэа, але не магу прымусіць сябе яго прагледзець. Баюся. Упэўненая, жарты былі жудасныя».
Свой жанр яна апісвае як спалучэнне ўразлівасці і з'едлівасці. Прычым гатовая казаць на самыя розныя тэмы – без якіх-небудзь межаў.
«Асноўная лінія – уразлівасць, – тлумачыць Дыбаль. – Я не баюся прызнаваць свае недахопы і казаць пра рэчы, пра якія звычайна не кажуць».
Ужо два гады яна знаходзіцца ў стасунках з яшчэ адным майстрам стэндапу – Рэйфам Уільямсам. Яны сустрэліся на выступах і спачатку паўгода проста сябравалі.
Удваіх яны з'яўляюцца на адных і тых жа афішах, выступаюць на адных і тых жа пляцоўках, і Рэйф у 2016 годзе перамог у тым самым конкурсе, што цяпер і Ціна.
«Гэта весела, – тлумачыць нараджэнка Беларусі. – Мы абое займаемся тым, што любім, і абое разумеем, што адбываецца».