Блогер-патрыёт пачаў суд над чыноўнікамі

Андрэй Павук дамагаецца ад бюракратаў галоснасці.

Суд Кастрычніцкага раёна (былая Рудабелка) прыступіць да разгляду скаргі блогера Андрэя Павука. Папярэдняе слуханне справы прызначанае на 10-ю раніцы 25 ліпеня 2018 года, паведамляе «Гомельская вясна».

Вядомы блогер патрабуе ад мясцовага райвыканкама і раённага «савета дэпутатаў» вольнай прысутнасці на апаратных нарадах у першым выпадку і на сесіях раённага «савета дэпутатаў» у другім.

Выконваючы дасудовы парадак урэгулявання спрэчкі, Андрэй Павук спрабаваў дастукацца да мясцовых чыноўнікаў і нават пісаў скаргу ў вобласць. Аднак усё дарэмна.

Райвыканкам адказаў, што старшыня праводзіць штотыднёвыя апаратныя нарады з кіраўнікамі структурных падраздзяленняў райвыканкама і іншых арганізацый і запрашае прадстаўнікоў толькі паводле тэматыкі разгляданых на нарадзе пытанняў. Старшыня райсавета быў больш сціслы. Паводле ягоных звестак, ён запрашае дэпутатаў, а інфармацыю пра сваю дзейнасць размяшчае ў раённай газеце.

Галоўная ўправа ідэалагічнай працы, культуры і справаў моладзі, куды скардзіўся блогер, заявіла, што жаданне прысутнічаць на нарадах і пасяджэннях не з'яўляецца для гэтага важкім чыннікам.

У скарзе суду ён апелюе законамі пра мясцовае кіраванне і самакіраванне, пра дзяржаўную службу і нават законам пра інфармацыю, якія асноўнымі прынцыпамі дзейнасці мясцовага самакіравання вызначаюць свабоду пошуку, атрымання, перадачы, апрацоўкі, захоўвання і распаўсюджвання інфармацыі.

Ягоныя інтарэсы ў судзе будзе прадстаўляць рэгіянальны юрыст Беларускай асацыяцыі журналістаў (БАЖ) Леанід Судаленка.