Мінабароны апавяло пра асаблівасці службы ў ІТ-роце
15- 22.07.2018, 15:20
- 10,189
Стварэнне новага падраздзялення абыдзецца беларускаму бюджэту на $600 тысячаў.
У Ваеннай акадэміі правялі сустрэчу для прадстаўнікоў рэзідэнтаў ПВТ, прысвечаную стварэнню ІТ-роты. dev.by прыводзіць новыя факты, якія сталі вядомыя пра падраздзяленне для айцішнікаў.
Мэта стварэння падраздзялення – распрацоўка ПА, спецыяльных і прыкладных праграмаў супольна з падраздзяленнямі Ваеннай акадэміі і (або) іншымі навуковымі, навучальнымі ўстановамі.
Навабранцы ІТ-роты атрымаюць ваенную спецыяльнасць «аператар ЭВМ». Два ўзводы на 20 чалавек прызавуць у 2018 годзе. Вясной 2019 года яшчэ адзін узвод – 20 чалавек. Праца спецыялістаў арганізаваная «ў асобнай аўдыторыі з абсталяваннем персанальных працоўных месцаў, якія маюць выхад у глабальную інфармацыйную сетку інтэрнэт і аб'яднаных у лакальную інфармацыйную сетку» – у своеасаблівым вайсковым оўпэн-спэйсе.
Ад навабранцаў патрабуецца веданне «прынамсі адной аб'ектна-арыентаванай мовы праграмавання (С++, Java і іншыя)», «веданне і ўменне працаваць з сістэмамі кіравання базамі дадзеных», «камунікабельнасць і ўменне працаваць у камандзе» і інш.
«Iнтэлектуальны патэнцыял Рэспублікі Беларусь велізарны. Гэты патэнцыял шмат у чым ствараецца таксама маладымі людзьмі, якія працуюць у сферы інфармацыйных тэхналогій і маюць вышэйшую адукацыю ў ІТ-спецыяльнасці. Цалкам натуральна, што гэтая катэгорыя грамадзянаў можа быць задзейнічаная ў інтарэсах забеспячэння ваеннай бяспекі дзяржавы», – паведамілі арганізатары сустрэчы.
Тэхнічнае абсталяванне роты абыдзецца на 280 тысячаў беларускіх рублёў, яшчэ больш за 900 тысячаў выдаткуюць на рамонт працоўных месцаў і казармаў.