У Славакіі пасля набажэнства ў храме прыхаджан частуюць півам
6- 22.07.2018, 17:56
- 9,406
У сельскай царкве ўсталяваны кранік з пенным напоем, каб зблізіць вернікаў.
У сацсетках, у тым ліку на беларускіх старонках, праходзіць дыскусія аб новаўвядзенні славацкага святара. У сельскай царкве ў Славакіі святар усталяваў... кранік з півам. Гаворка ідзе пра храм святога Лукі ў сяле Склене-Цяпліцэ, піша katolik.life са спасылкай на славацкую прэсу.
Бацюшка Віт Тужынскі, якому належыць ідэя, патлумачыў яе так: у часы ранняга хрысціянства людзі не сыходзілі з храма адразу пасля набажэнства, а заставаліся, каб разам паесці, выпіць, пагутарыць.
Некаторыя са старэйшага пакалення асудзілі новаўвядзенне, мяркуючы, што падобнаму - не месца ў храме. Але святар упэўнены, што нічога дрэнна ў ягонай ідэі няма, і падае словы апостала Паўла з Першага паслання да Карынфянаў у Новым Запавеце: «Ежце, ці п'яце, ці нешта іншае робіце, усё рабіце на славу Божую».
З дапамогай піва, якое лічыцца ў гэтых месцах традыцыйным напоем, святар спадзяецца зблізіць мясцовых жыхароў. Дарэчы, кранікаў устаноўлена два, адзін з іх - з безалкагольным напоем. За налітыя куфлі людзі пакідаюць ахвяраванні, складаючы грошы ў куфаль.