База звестак аб даходах насельніцтва: выпрабаванні пачатыя

МПЗ будзе ведаць аб даходах беларусаў з-за мяжы.

Праграмны комплекс, з дапамогай якога падаткавікі будуць кантраляваць усе даходы грамадзян праходзіць тэставыя выпрабаванні, паведамляецца на сайце МПЗ. Яны працягнуцца да канца года, і падлучыцца да іх можа любы суб'ект гаспадарання, які хоча загадзя падрыхтавацца да чарговых зменаў у сваёй працы, піша «Экономическая газета».

Справа ў тым што выкарыстанне базы звестак аб даходах стане абавязковым з 1 студзеня 2019 г., калі ўсе падатковыя агенты будуць павінны кожны квартал падаваць інфармацыю аб даходах грамадзян у падатковыя органы ў электронным выглядзе - своеасаблівую даведку аб іх даходах. «Загадвае» гэтым рэсурсам СТАА «Беларускія хмарныя тэхналогіі».

Паведамляецца, што пры яго распрацоўцы было развязана некалькі задач:

1) забеспячэнне магчымасці ўводу звестак аб даходах з рэгістраў бухгалтарскага ўліку ў базу звестак з клавіятуры кампутара;

2) праверка ўведзеных звестак, у тым ліку ўзятых з бухгалтарскіх праграм, на правільнасць запаўнення перад адпраўкай у падатковыя органы і, калі ўсё добра, адпраўка іх праз Інтэрнэт;

3) забеспячэнне зваротнай сувязі. Падатковы агент павінен атрымаць пацверджанне аб атрыманні адпраўленай інфармацыі, а таксама аб выніках яе праверкі падаткавікамі і выяўленых памылках.

Паведамляць давядзецца амаль пра ўсе даходы і грашовыя паступленні (напрыклад, пра крэдыты і пазыкі, сумы, атрыманыя ад продажу кватэр, жылых дамоў і аўтамабіляў), па-за залежнасці ад таго, выплачваецца з іх падаходны падатак ці не, аб падатковых выліках, выдатках грамадзян па аперацыях з каштоўнымі паперамі і фінансавымі інструментамі. Спіс выключэнняў, пра якія не давядзецца «дакладваць», надзвычай малы: мікразаймы, камерцыйныя пазыкі, асобныя віды крэдытаў, даходы, што выплачваюцца нарыхтоўшчыкамі.

Падаваць «электронную» даведкі трэба будзе ў інспекцыю МПЗ па месцы пастаноўкі адпраўніка інфармацыі на ўлік. А для стварэння гэтай даведкі МПЗ прапануе два варыянты: 1) выкарыстоўваць спецыяльную праграму «падатковы агент», якую ўжо цяпер можна спампаваць на сайце падатковага ведамства і якая пераўтворыць уведзеныя звесткі ў фармат базы звестак; 2) ужыць сэрвіс «асабісты кабінет» на сайце МПЗ, доступ да якога ажыццяўляецца з дапамогай электроннага лічбавага подпісу, дзе будзе створаны спецыяльны раздзел.

Каментар «ЭГ»

Новы праграмны рэсурс - гэта мара любога кантралёра. Усе легальныя даходы грамадзян апынуцца бачныя падаткавікам, адсачыць людзей, якія атрымліваюць значныя грашовыя сумы, цяпер не складзе працы. Будзем спадзявацца, што перададзеную інфармацыю добра абароняць ад «хакераў» і зламыснікаў.