Сотні магілёўцаў працавалі бясплатна ў выходны праз капрыз «мэра»

Кіраўнік Магілёва захацеў палётаць на шрубалёце, каб паглядзець, як ідзе добраўпарадкаванне горада.

«Гэтакі інавацыйны падыход інспектавання ходу працы, але такая інавацыя адбілася на кішэнях жыхароў горада», паведамляе 6tv.by.

З 20 жніўня да 19 верасня распараджэннем гарвыканкама кожныя выходныя для жыхароў горада сталі бясплатнымі працоўнымі днямі (суботнікамі). Звычайна людзі працуюць на сваім працоўным месцы і пералічваюць у бюджэт горада дзённы заробак. Зыходзячы з сярэдняга заробку ў горадзе недзе 20–30 рублёў кожны.

І ўсё б нічога, калі б гэтыя грошы пайшлі на нейкую добрую справу – рамонт дарог у дварах, будаўніцтва веладарожкі і г.д. Але, на жаль, грошы ідуць на пражэкты кіраўніцтва горада, якія не нясуць ніякага практычнага сэнсу – розныя «трыўмфальныя» аркі, «пацёмкінскія» лесвіцы і... пакатушкі на шрубалёце.

Давайце палічым, колькі каштуе палётаць на шрубалёце і колькім людзям трэба адпрацаваць у законны выхадны, каб кіраўнік горада ажыццявіў мару?

Гадзіна палёту на шрубалёце каштуе 1500 рублёў. З улікам дастаўкі шрубалёта і аблёту горада гэта, як мінімум, дзве гадзіны. У выніку, паводле мінімальных разлікаў, гэта 3000 рублёў.

Кожны жыхар горада пералічвае ў бюджэт за суботнік 20–30 рублёў. Няхітрыя матэматычныя дзеянні, і мы атрымліваем, што ад 100 да 150 жыхароў павінны бясплатна адпрацаваць у свой выходны, каб кіраўніцтва горада зладзіла абсалютна бессэнсоўную інспекцыю.

Больш карысна было б, калі б магілёўскі кіраўнік горада праінспектаваў горад на сваім службовым аўто, з бюджэтам 100 рублёў, дзе ён убачыў бы тое, чаго не разглядзець з шрубалёта.

А менавіта: ён убачыў бы, што развальваюцца масты пасля капітальнага рамонту, што няма дарог у дварах дамоў і ў прыватным сектары, што халтурна праводзяцца рамонты ў добраўпарадкаванні і многае іншае.

А так: «Сур'ёзных нараканняў да прадпрыемстваў і арганізацый Магілёва мы не выявілі». І не выявіце, спадар кіраўнік горада, пакуль у аблоках лётаць будзеце.