Жыхарам дома на Маркса далі 48 гадзін на добраахвотнае высяленне

У адваротным выпадку жыхароў выселяць прымусова 20 верасня.

18 верасня жыхары дома на Маркса, 17, дзе ў асноўным пражываюць сем'і ветэранаў КДБ і МУС, атрымалі паведамленні аб высяленні. Прадпісанні ўручалі судовыя прыставы ў прысутнасці сведак. На добраахвотны выезд з кватэр людзям далі два дні. Сённяшні – таксама лічыцца. У адваротным выпадку жыхароў выселяць прымусова 20 верасня.

На высяленні ўсіх жыхароў з дома на Маркса, 17, нагадаем, намагае адміністрацыя Ленінскага раёна. Мясцовыя ўлады матывуюць гэта вынікамі тэхнічнай экспэртызы дома, якая была праведзеная НПУП «Будрэканструкцыя» ў жніўні 2018 года. Спецыялісты, абследаваўшы будынак, далі выснову аб тым, што ён знаходзіцца ў перадаварыйным стане і патрабуе высялення людзей.

Кіраўнік адміністрацыі Ленінскага раёна Пётр Шостак у каментары tut.by распавёў, што людзей пераселяць толькі на час работ для ўмацавання падмурку будынка - дом пад пагрозай разбурэння. Працы, са слоў кіраўніка раёна, зоймуць месяц, калі «не будзе ніякіх абцяжарвальных абставін».

Для часовага пражывання жыхарам далі кватэры з падменнага фонду раёна. Праўда, добраахвотна людзі пераязджаць так і не пагадзіліся. Жыхары ўпэўненыя, што калі выедуць з дому, то будынак сапраўды стане непрыдатным для пражывання. Значыць, вярнуцца ў свае кватэры яны ўжо не змогуць.

- Ёсць іншая экспэртыза, не візуальная, якая паказала, што зношанасць будынка ўсяго 39% і што пагрозы руйнавання ў яго няма. Была яна ўсяго толькі год таму. А цяпер выйшла, што ўсё нібыта так дрэнна, што трэба тэрмінова выязджаць — - распавядае ўпаўнаважаны жыхароў дома Сяргей Ляднёў.

Ён успамінае, што гісторыя з пагрозай высялення ўжо была ў 2016 годзе, калі жыхарам прапанавалі выехаць на два месяцы з іх кватэр. Тады Сяргей Пятровіч напісаў лісты «мэру» горада, генпракурору, старшыні КДК, дзе распавёў аб тым, чаму дом прыходзіць у непрыдатнасць і хто ў гэтым можа быць вінаваты.

«Першы паверх нашага дома знаходзіцца ў арэндным карыстанні ТАА "Савана-Спорт трэйдзінг». У 2013 годзе гэтай кампаніі адміністрацыя Ленінскага раёна дазволіла змяніць функцыянальнае прызначэнне прадуктовай крамы ў нашым доме на кавярню-булачную. У гэтым жа годзе краму закрылі на рамонт. Мы ўпэўненыя, што падчас рамонту дому быў прычыненая шкода, бо работы праводзіліся без нагляду і ўліку таго, што будынак з'яўляецца гісторыка-культурнай каштоўнасцю», — гаворыцца ў лісце.

- Рамонтныя работы былі прыпыненыя. У лютым 2016 года нас паклікалі на сход, дзе інтарэсы арандатара, які пашкодзіў дом, былі прадстаўлены адміністрацыяй Ленінскага раёна. Нам паведамілі, што патрэбны капітальны рамонт дома за кошт бюджэтных сродкаў з адсяленнем жыхароў на нявызначаны тэрмін. І гэта ўлічваючы тое, што ў 1978 годзе ў нашым доме праводзіўся капрамонт з адсяленнем жыхароў на чатыры гады.

Тады, мяркуюць жыхары, ім удалося адбіцца ад пераезду і абараніць сваё жыллё. Многія тут нарадзіліся і выраслі. З'язджаць кудысьці з цэнтра горада, зразумелая справа, нікому не хочацца.

Сяргей Пятровіч сваё апавяшчэнне знайшоў заціснутым у праём дзвярэй. Там паведамлялася, што калі ягоная сям'я не выедзе да 19 верасня, іх выселяць прымусова раніцай 20-га. Сям'і Ляднёвых прапанавалі кватэру з манеўранага фонду на вуліцы Прушынскіх.

Мясцовая жыхарка Галіна, у якой мы напярэдадні пабывалі ў гасцях і паглядзелі, як выглядае ейная кватэра, даведаўшыся пра прадпісанні, расплакалася.

— Сваволльства ва ўсіх сэнсах (...). Мне вельмі хочацца плакаць. Адчуванне беспакаранасці людзей, якія ўсё гэта задумалі, - не магла стрымаць эмоцый Галіна.

Сяргей Пятровіч заўважыў, што ў загадзе не сказана, на які тэрмін давядзецца выехаць.

- Ніякіх дакументаў аб тым, што мы сюды вернемся, няма.