На ўкраінска-беларускай мяжы пачаўся другі этап прапускання грамадзян для збору ягад

Другі этап сэзоннага прапускання грамадзян для збору дзікарослых ягад будзе працягвацца да 15 лістапада.

З 1 верасня на ўкраінска-беларускай мяжы пачаўся другі этап сэзоннага прапускання грамадзян для збору дзікарослых ягад, які будзе працягвацца да 15 лістапада 2018 года, паведамляецца на афіцыйным сайце Дзяржаўнай памежнай службы Украіны ў нядзелю, перадае interfax.by.

"З учорашняга дня на адцінку адказнасці аддзела памежнай службы "Бярозавае" ў Ракітнаўскім раёне Ровенскай вобласці памежнікі Луцкага аддзела пачалі прапускаць грамадзян для збору дзікарослых ягад. Рэгістрацыя грамадзян ужо традыцыйна будзе ажыццяўляцца ў трох часовых месцах прапускання: "Познань", "Бярозавае" і "Дроздынь" штодня з 8.00 да 20.00", - гаворыцца ў паведамленні.

У Дзяржаўнай памежнай службе адзначылі, што сёлета ад мяжы было вернута 388 дарослых і 47 дзяцей, якія альбо спрабавалі скараціць шлях па-за пунктамі прапускання, альбо траплялі на тэрыторыю сумежнай краіны з няўважлівасці. Беларускія памежнікі затрымалі 52 парушальнікаў мяжы і прыцягнулі іх да адміністрацыйнай адказнасці.

У памежнай службе таксама нагадваюць, што з 29 красавіка ўвайшоў у дзеянне закон Украіны "Аб унясенні змен у некаторыя заканадаўчыя акты Украіны аб гарантаванні памежнай бяспекі дзяржавы", якім павышаецца штраф на злоснае непадпарадкаванне патрабаванням памежнага патруля да 850-3400 грн, а за незаконны пераход дзяржаўнай мяжы - да 3,4-13,6 тысячы грыўняў.

Акрамя таго, ва ўкраінскай памежнай установе нагадваюць, што ў адпаведнасці з заканадаўствам Беларусі за парушэнне дзяржаўнай мяжы можа надысці не толькі адміністрацыйная, але і крымінальная адказнасць.