26 сакавiка 2019, aўторак, 9:55
Выклік для кожнага
Рубрыкі

Bloomberg: Ядзерная праграма КНДР выйшла на новы ўзровень насуперак угодзе Трампа з Кімам Чэнам Ынам

9

Паўночная Карэя прадаўжае таемна распрацоўваць ядзерныя і ракетныя ўзбраенні.

Гэта адбываецца насуперак заявам кіраўніка КНДР Кім Чэн Ына, піша Bloomberg (пераклад - newsader.com) са спасылкай на звесткі амерыканскай выведкі і спадарожнікавыя здымкі. Яны паказваюць, што пасля абвяшчэння аб прыпыненні выпрабаванняў КНДР прадаўжае вырабляць ракеты і боегалоўкі з ранейшай хуткасцю, гаворыцца ў публікацыі. Як сцвярджаецца, паўночнакарэйскія ўлады зрабілі дастаткова матэрыялу для стварэння яшчэ шасці атамных бомбаў.

Спецыялістка ў аналізе распаўсюджвання зброі Меліса Ханхам мяркуе, што ракетна-ядзерная праграма Пхеньяна не толькі не запаволілася, але і выйшла на новы ўзровень.

Паводле звестак амерыканскіх спецслужбаў, Паўночная Карэя прадоўжыла эксплуатаваць два заводы для ўзбагачэння ўрану. У ліпені дзяржсакратар ЗША Майкл Пампэа вымушаны быў прызнаць на слуханнях у Сенаце, што КНДР усё яшчэ стварае матэрыялы для вырабу атамнай зброі.

Іншыя крыніцы сцвярджаюць, што Паўночная Карэя ўмацавала свой ядзерны арсенал напярэдадні другога саміту з прэзідэнтам ЗША Дональдам Трампам і па-ранейшаму выкарыстоўвае аб'ект, на якім, як мяркуецца, паўночнакарэйскія ўлады зрабілі свае першыя міжкантынентальныя балістычныя ракеты, здольныя дасягнуць кантынентальнай тэрыторыі Злучаных Штатаў.

Больш за тое, як сцвярджаецца, Пхеньян мадэрнізаваў фабрыку, на якой вырабляюцца рухавікі для новых - менш прыкметных - ракет на цвёрдым паліве, а таксама пашырыў падземную базу для ракет вялікай далёкасці.

Такім чынам, піша выданне, выведка ЗША захоўвае скептыцызм у дачыненні да абавязацельстваў Кіма ў дэнуклеарызацыі, у тым ліку да яго выкладзенага пад Новы год абяцання «больш не вырабляць і не выпрабоўваць ядзерную зброю».

Аналітыкі звяртаюць увагу на тое, што Пхеньян з выгадай выкарыстоўвае перамовы з Трампам: КНДР прадаўжае непрыкметна ўмацоўваць свой арсенал у варунках змякчэння дыпламатычнага клімату, неабходнага Паўночнай Карэі для зняцця санкцый і легітымацыі свайго ядзернага статусу.

Паводле звестак экспэртаў, цяпер толькі пытанне часу - калі менавіта Кім Чэн Ын павысіць дакладнасць сваіх ракет і палепшыць сродкі дастаўкі ядзернай зброі такім чынам, каб яны былі прыдатныя для нанясення прыцэльнага ядзернага ўдару па тэрыторыі ЗША.

Паўночнакарэйскія ўлады неаднаразова давалі зразумець, што ўсякая ўгода аб раззбраенні з Вашынгтонам запатрабуе выдалення амерыканскіх войскаў, авіяцыі і ВМС з карэйскага рэгіёну. Разам з тым Кім Чэн Ын не спяшаецца абнародаваць інфармацыю аб сваім ядзерным арсенале, а без гэтага немагчыма зразумець, якім менавіта ўзбраеннем валодае Пхеньян. Дзесяцігоддзямі Паўночная Карэя разлічвала на сетку падземных тунеляў і сакрэтных аб'ектаў з мэтай утойвання сваіх ядзерных аб'ектаў ад амерыканскіх спадарожнікаў.

На думку міжнародных інспектараў, ядзерная праграма Кіма дасягнула стадыі, калі яна ў стане развівацца без правядзення выпрабаванняў, што яшчэ больш абцяжарвае маніторынг. Міжнароднае агенцтва ў атамнай энэргіі падкрэсліла сваю занепакоенасць у жнівеньскай справаздачы, заявіўшы, што «звесткі аб ядзернай праграме КНДР абмежаваныя» і што яны становіцца яшчэ больш скупымі па меры яе далейшага развіцця.

У сваю чаргу міжнародны рэжым санкцый не перашкаджае Паўночнай Карэі ствараць усё новыя ракеты і боегалоўкі: для гэтых мэтаў трэба не так ужо шмат грошай і матэрыялаў. «Хаця санкцыі могуць націснуць на эканоміку, яны не прычыняюць шкоды праграме ўзбраенняў», - сказаў спецыяліст у нераспаўсюджванні Джэфры Льюіс.

У сваю чаргу дзяржсакратар ЗША Майк Пампэа ў пятніцу абвясціў, што ЗША прадоўжаць дамагацца ядзернага раззбраення Паўночнай Карэі.

У чэрвені Трамп падпісаў з Кімам Чэнам Ынам пагадненне аб дэнуклеарызацыі Карэйскага паўвострава. З тых часоў СМІ неаднаразова распавядалі пра тое, што лідар КНДР фактычна не выконвае абавязацельстваў. Нягледзячы на гэта, кіраўнік Белага дома прадаўжае намагаць на выніковасці дыпламатычнага падыходу Пхеньянам.