«Настоящее время»: У 2017 годзе кампанія Зяленскага атрымала грошы ад Мінкульта РФ

Кампанія «Грын Філмс» атрымала больш за паўмільёна даляраў.

Тэлеканал "Настоящее время" знайшоў дакументы, якія пацвярджаюць, што расейская кампанія «Грын Філмс» атрымала 35 мільёнаў рублёў ($526 тысяч) ад Міністэрства культуры Расеі ў 2017 годзе на вытворчасць фільма «Уніз». Пра гэта гаворыцца ў пагадненні 054-11-975/1 у рэестры субсідый федэральнага бюджэту РФ.

Як раней паведамлялі журналісты-следчыя праграмы «Схемы», канчатковым уладальнікам «Грын Філмс» праз кампанію на Кіпры з'яўляецца ўкраінскі шоўмэн Уладзімір Зяленскі. Раней ён заявіў пра свае намеры балатавацца ў прэзідэнты Украіны.

У інтэрв'ю «Схемам» Зяленскі адмовіўся гаварыць аб сваім бізнэсе ў Расеі, а пазней запісаў ролік, дзе адмаўляў, што ў яго ёсць такі бізнэс. Аднак праз некалькі дзён ён пацвердзіў сайту «Украінская праўда», што «Грын Філмс» прадаўжае працаваць у Расеі. Паводле новай версіі шоўмэна, кампанія была ім перададзеная ва ўправу, і заяўку на дзяржаўнае фінансаванне ў Расеі падавалі іншыя людзі, «тыя, хто займаецца гэтай кампаніяй».

Ён таксама заявіў, што «найбліжэйшым часам» выйдзе з кіпрскай кампаніі, якой належыць «Грын Філмс».

Зяленскі распавёў, што ягоная кампанія «Квартал 95» прадаўжае атрымліваць раялці за прадукты, вырабленыя да 2014 года - анэксіі Крыма Расеяй і пачатку баявых дзеянняў на Данбасе. Напрыклад, за серыял «Сваты».

«Кантракт укладзены на 10 гадоў. Як я магу закрыць гэтую кампанію? Кантракт да 2021 года. З 2011 да 2021 года мы атрымліваем раялці ад «Сватоў». Мы гэтыя грошы атрымліваем. Што ж нам трэба рабіць? Закрыць? Падарыць расейцам нашы грошы? Не», - заявіў ён.

Раней журналісты «Схем» знайшлі тры расейскія кампаніі, якія займаюцца вытворчасцю кіно і тэлевізійных праграм: «Вайсберг пікчэрс», «Плацінумфільм» і «Грын Філмс». Заснавальнік усіх трох кампаній - зарэгістраваная на Кіпры Green Family Ltd. Яна ж - сузаснавальнік ТАА «Квартал 95», канчатковым бенефіцыярам якога пазначаны Уладзімір Зяленскі і ягоныя партнёры.

У Расеі тры кампаніі, знойдзеныя журналістамі, з 2014 да 2017 года зарабілі амаль 13 мільёнаў даляраў.