Журналіст Кастусь Жукоўскі з'ехаў з Беларусі
15- 28.01.2019, 12:27
- 19,604
Нагодай паслужыў напад на ягонае аўто.
Гомельскі журналіст Кастусь Жукоўскі з'ехаў з Беларусі. За ім пакінулі краіну ягоная жонка з дачкой, паведамляе «Еўрарадыё».
Паводле слоў Жукоўскага, астатняй кропляй, якая схіліла яго да такой пастановы, стаў напад на ягоны аўтамабіль 13 студзеня на дарозе Холмеч - Брагін - Хойнікі. Журналіст ехаў са сваім спадарожнікам Барысам Анікеевым і спыніўся, каб праверыць, чаму пераграваецца рухавік аўтамабіля. Да іх машыны адразу пад'ехаў джып, і чацвёра мужчын атачылі Жукоўскага і Анікеева.
«Мне пырснулі ў твар нейкай пякучай вадкасцю, нават акуляры ў мяне ўпалі. Кастуся збілі з ног, выхапілі дакументы, парвалі пашпарт, які быў, на шчасце, пратэрмінаваны. Яшчэ і паздзекаваліся: «Вось табе замежжа!» - распавёў Анікееў.
У міліцыю ні Жукоўскі, ні Анікееў не звярталіся. Жукоўскі кажа, што не бачыць сэнсу ў такіх зваротах. Раней журналісту пагражалі праз Facebook і электронную пошту. Але пры звароце ў міліцыю журналісту заявілі, што не могуць знайсці таго, хто дасылаў лісты з пагрозамі. «Яшчэ раней мяне дома даймалі незнаёмыя хуліганы - іх таксама не было выяўлена», - дадае Жукоўскі.
Са слоў журналіста, цяпер ён вывучае замежную мову ў адной з краін Заходняй Еўропы.
За апошнія гады міліцыя дзясяткі разоў затрымлівала Жукоўскага. За 2018 год на журналіста склалі блізу двух дзясяткаў адміністрацыйных пратаколаў, абвінавачваючы ў незаконным вырабе прадукцыі СМІ без акрэдытацыі для спадарожнікавага канала «Белсат». За год яго аштрафавалі на 12 432,5 рубля, што перасягае гадавы сярэдні заробак у Беларусі.