У Астраўцы рыхтуюцца да аварыі на БелАЭС
18- 11.10.2019, 10:20
- 17,074
У раён будаўніцтва станцыі МНС перакідае 270 чалавек і 40 адзінак тэхнікі.
У Астравецкім раёне цягам дня, 11 кастрычніка, адбудуцца вучэнні для рэагавання на радыяцыйную аварыю. Пра гэта паведамляе БелТА.
У вучэннях будуць задзейнічаныя больш за 270 чалавек і больш за 40 адзінак тэхнікі, у тым ліку сілы і сродкі МНС, МУС, Мінабароны, Дзяржпамежкамітэта, Міністэрства аховы здароўя і іншых арганізацый, а таксама падраздзяленняў дзяржкарпарацыі «Расатам».
«Каб не ствараць нязручнасцяў грамадзянам, адпрацоўка эвакуацыі пройдзе з удзелам статыстаў. Напярэдадні ратавальнікі адрасна праінфармавалі ўсіх жыхароў вёсак – 183 чалавекі ў васьмі населеных пунктах», – апавялі ў МНС.
Персанал АЭС прадэманструе дзеянні для лакалізацыі і ліквідацыі аварый на рэактарным абсталяванні, эвакуацыю і сховішча ў ахоўных збудаваннях, функцыянаванне крызіснага цэнтра і інфармацыйнае ўзаемадзеянне. Падраздзяленні МНС ліквідуюць пажар склада дызельнага паліва ва ўмовах аварыйнай абстаноўкі.
Раней падобныя вучэнні прайшлі ў Літве. Тут спецслужбы вучыліся рэагаваць на надзвычайныя здарэнні на БелАЭС. У вучэннях таксама былі задзейнічаныя мясцовыя жыхары, спецтэхніка і адказныя службы.