Нафта падаражэла пасля выбухаў на іранскім танкеры

Інцыдэнт павышае верагоднасць перабояў з пастаўкамі «чорнага золата» з найважнейшага здабыўнога рэгіёну.

У пятніцу, 11 кастрычніка, кошты на нафту выраслі на 2% пасля навінаў ад іранскіх інфармацыйных агенцтваў, што іранскі дзяржаўны нафтавы танкер Sinopa быў абстраляны дзвюма ракетамі ў Чырвоным моры недалёка ад Саудаўскай Аравіі. Гэты інцыдэнт павышае верагоднасць перабояў з пастаўкамі з найважнейшага здабыўнога рэгіёну, паведамляе Reuters (пераклад – zn.ua).

Кошт бараля снежаньскай нафты Brent вырас на 1,07 даляра (1,8%) да 60,27 даляраў за бараль. Бараль лістападаўскай нафты WTI гандляваўся як 54,47 даляра (+1,72%).

Паводле іх інфармацыі, у выніку выбуху былі пашкоджаныя два асноўныя рэзервуары танкера, нафта разлілася ў моры. Экіпаж судна не пацярпеў.

"Запасы нафты застаюцца далікатнымі, а ўразлівасць ланцужка паставак выклікае непакой практычна на кожным блізкаўсходнім нафтавым радовішчы, трэйдары прадаўжаюць хеджыраваць прэмію за рызыку паставак", – сказаў азіяцка-ціхаакіянскі рынкавы стратэг-аналітык AxiTrader Стывен Інэс.

Паведамленне пра інцыдэнт з іранскім нафтавым танкерам прыйшло пасля нападаў

21 верасня кошты на нафту маркі Brent паказалі максімальны рост са студзеня гэтага года – на 6,7%. Нафта WTI падаражэла на 5,9%, што стала самым высокім паказнікам з чэрвеня.

Нафта даражэла на фоне скарачэння Саудаўскай Аравіяй здабычы сыравіны пасля атакі дронаў на найбуйнейшыя нафтавыя аб'екты каралеўства ў Хурайсе і Абкайку 14 верасня.

Нагадаем, на досвітку 14 верасня абсталяваныя выбухоўкай баявыя дроны атакавалі найбуйнейшы нафтаперапрацоўчы завод кампаніі Saudi Aramco ў Абкайку і нафтавае радовішча ў Хурайсе. Адказнасць за атаку ўзялі на сябе еменскія баевікі-хусіты.

Пасля нападу сутачная вытворчасць нафты-сырца ў Саудаўскай Аравіі скарацілася амаль удвая – на 5,7 млн бараляў за суткі. Гэта 5% сусветных паставак нафты. У агульнай колькасці на Саудаўскую Аравію прыходзіцца 10% усёй сусветнай нафтаздабычы, пры гэтым праз НПЗ у Абкайку праходзіць 7% сусветных паставак нафты.

ЗША і Саудаўская Аравія ўсклалі адказнасць за напад на Іран, які падтрымлівае хусітаў. Міністэрства фінансаў Злучаных Штатаў уключыла ў санкцыйныя спісы 16 іранскіх кампаній, дзевяць фізічных асобаў і шэсць нафтавых танкераў.