Расея адмовілася прызнаваць перад Беларуссю запазычанасць за «падатковы манеўр»
23- 11.10.2019, 16:47
- 26,597
Кампенсацыі не будзе.
Разлікі беларускага міністэрства фінансаў з нагоды страт праз расейскі падатковы манеўр некарэктныя, бо гэтая сума не належыць да абавязацельстваў Расеі перад Беларуссю, заявіў ТАСС прэс-сакратар прэм'ер-міністра РФ Алег Осіпаў.
Са слоў Осіпава, у такім святле развагі выглядаюць дзіўнымі. "Немагчыма страціць тое, што табе не належыць", - цытуе чыноўніка выданне.
"Так званыя страты бюджэту Беларусі праз змену расейскага заканадаўства, зрэшты, падатковага манеўру, не належаць да існых абавязацельстваў РФ перад Беларуссю, у тым ліку фінансавых", - дадаў ён.
10 кастрычніка кіраўнік беларускага Мінфіна Максім Ермаловіч паведаміў, што ў 2020 годзе страты ад падатковага манеўру складуць 400 мільёнаў даляраў, а за два гады, 2019-ы і 2020-ы, страты дасягнуць 800 мільёнаў.
Расея - адзіны пастаўшчык нафты ў Беларусь. Паводле дамовы 2017 года Масква пастаўляе 24 мільёны тон сыравіны, пры гэтым шэсць мільёнаў тон Менск мае права накіроўваць на рээкспарт, а экспартны падатак ідзе ў беларускі бюджэт.
Падатковы манеўр азначае, што калі раней Беларусь атрымлівала нафту паводле ўнутраных расейскіх коштаў, то да 2024 года кошт дасягне сусветнага ўзроўню.