Першае «прывітанне» туркам ад курдаў

Курды імкнуцца дзейнічаць відавочна з апярэджаннем.

Дэмакратычныя сілы Сірыі ўжо далі першы адказ на дзеянні турэцкіх ўзброеных сіл на поўначы Арабскай рэспублікі – абстралялі з артылерыі размешчаны паблізу мяжы з Сірыяй турэцкі горад Нусайбін, паведамляе іранскае выданне Farda, (пераклад - inosmi.ru).

ІА «Фарс»: Пра артабстрэл горада Нусайбіна баевікамі Дэмакратычных сілаў Сірыі паведамляе сірыйская нацыянальная тэлевізія.

Аднак курды імкнуцца дзейнічаць відавочна з апярэджаннем, спрабуючы арганізаваць супраць турэцкага наступу падабенства прэвентыўнага ўдару. Баевікі курдскіх груповак у адказ на дзеянні турэцкіх ВПС і артабстрэл сірыйскай тэрыторыі акрамя артабстрэлаў таксама падпалілі некалькі нафтавых свідравін, размешчаных у правінцыі Эль-Хасака.

Прадстаўнік Дэмакратычных сілаў Сірыі, Кіну Габрыэль у інтэрв'ю арабскаму аддзяленню тэлеканала Sky News заявіў, што турэцкае войска, нягледзячы на відавочную перавагу, падчас свайго цяперашняга наступу на поўначы САР не зможа дасягнуць ніводнай з пастаўленых задач. Акрамя таго, ён адзначыў, што ў Дэмакратычных сілаў «ёсць, чым адказаць» на турэцкае ўварванне, аднак у чым менавіта будзе палягаць «адказ» курдаў, Габрыэль не ўдакладніў.

Нагадаем, што аб пачатку баявых аперацый супраць курдаў на поўначы Сірыі яшчэ да пачатку наступу паведаміў у афіцыйнай заяве сам прэзідэнт Турэцкай Рэспублікі, Раджэп Таіп Эрдаган. Ён адначасова, паводле канстытуцыі, уважаецца і за Вярхоўнага галоўнакамандуючага турэцкіх узброеных сілаў.

Інфармаваная крыніца ў інтэрв'ю для выдання «Энаб Баладзі» заявіла, што турэцкія ВПС спрычыніліся да бамбаванняў ды абстрэлаў сямі памежных раёнаў на поўначы Сірыі. Менавіта ў гэтых раёнах, са слоў турэцкіх вайскоўцаў, сканцэнтраваныя групоўкі баевікоў, якія прадстаўляюць пагрозу Турцыі, якіх неабходна «зачысціць», з тым, каб стварыць тут у далейшым так званыя «калідоры бяспекі». Паводле інфармацыі крыніцы, турэцкая авіяцыя спрычынілася да абстрэлу збожжасховішча, размешчанага ў горадзе Рас эль-Айн, акрамя таго, удары зазналі наваколлі паселішча Мушарафа, а таксама гарадок Айн Іса на поўнач ад Ракі. Такім чынам, цэлямі турэцкага войска ўжо сталі далёка не толькі «навалы баевікоў», але і чыста грамадзянскія аб'екты.

Акрамя таго, крыніца распавяла аб абстрэле паселішча Джарнак, размешчанага ў 3-х кіламетрах на ўсход ад населенага пункта Камышлы. Ён таксама дадаў, што большасць жыхароў горада Рас эль-Айн пакінулі горад і бягуць у бок горада Тэль Аб’яд. Звязанае з сірыйскімі курдамі інфармагенцтва «Інха» яшчэ паведаміла аб абстрэле паселішча Сафах на захад ад згаданага горада Рас эль-Айн.

Такім чынам, маштабы турэцкага наступу на гэты момант ужо сапраўды шырокія. А турэцкае агенцтва навінаў «CNN-Turk» паведаміла, што турэцкая авіяцыя для здзяйснення баявых вылетаў падымаецца з аэрадромаў так званай «вайсковай базы №8», правінцыі Дзіярбакыр. Паведамляецца пра ахвяры сярод удзельнікаў ваеннай аперацыі з абодвух бакоў. Ёсць звесткі аб 7 загінулых і 23 параненых.