На сайце Міністэрства адукацыі заўважылі праграму для тайнага майнінга крыптавалют на кампутарах наведвальнікаў

Антывірус блакуе сайт беларускага Міністэрства адукацыі.

У рэдакцыю tut.by звярнуўся чытач Валерый, які заўважыў, што яго антывірус блакуе сайт Міністэрства адукацыі РБ. Высветлілася, што з гэтай старонкі распаўсюджваўся шкоднасны скрыпт, які прызначаны для майнінга крыптавалюты на кампутарах наведвальнікаў.

- Антывірус DrWeb пры спробе ўваходу на сайт Міністэрства адукацыі РБ выдаваў паведамленне «URL заблакаваны», - распавёў Валерый. - Я адправіў спасылку ў лабараторыю DrWeb. І вось адказ: «Гэта не ілжывае спрацоўванне. З гэтага сайта сапраўды распаўсюджваецца шкоднасны скрыпт JS. BtcMine, які прызначаны для здабычы (майнінга) крыптавалюты на кампутарах наведвальнікаў, пакуль у браўзеры наведвальніка адкрыта гэтая старонка. Гэты скрыпт мог быць размешчаны на сайце як свядома яго адміністрацыяй, так і без ведама адміністрацыі шляхам узлому сайта або выкрадання адміністратарскіх уліковых звестак. Рэкамендуем звязацца з арганізацыяй, якой належыць гэты сайт».

Журналісты звязаліся з прэс-сакратаркай Міністэрства адукацыі Людмілай Высоцкай. Яна пацвердзіла, што, сапраўды, такая праблема назіраецца з раніцы 11 кастрычніка, але спецыялісты ўжо працуюць над яе ліквідацыяй. Сайт павінен запрацаваць найбліжэйшым часам.

JS.BtcMine - гэта сямейства сцэнарыяў на мове JavaScript, прызначаных для схаванай здабычы (майнінга) крыптавалют.