У Магілёве з дапамогай «зялёнага шчыта» бароняцца ад хімічных прадпрыемстваў
5- 12.10.2019, 21:07
- 12,880
Беларусы вінавацяць уладу, якая дазволіла размяшчаць шкодныя вытворчасці без уліку небяспекі.
2300 саджанцаў клёну і бярозы высадзілі пад Магілёвам, каб абараніць ад негатыўнага ўздзеяння хімічных вытворчасцяў прылеглыя паселішчы, паведамляе «Радыё Свабода».
Мясцовыя жыхары і эколагі намагаюць, што гэтыя прадпрыемствы прычыняюць шкоду здароўю людзей і навакольнаму асяроддзю.
Экалагічны актывіст: «Каб цалкам аднавіць знішчаную лесапаласу, трэба яшчэ 5-7 тысяч дрэў»
12 кастрычніка бярозы і клёны талакой высаджвалі ў пасёлку Вейне і ўсцяж Гомельскай шашы - мяжы пляцоўкі з хімічнымі вытворчасцямі.
Актывіст Андрэй Бодзілеў называе гэтую экалагічную акцыю «Зялёны шчыт». Ён сцвярджае, што ідэю масавай высадкі дрэў прапанавалі камітэту аховы прыроды і навакольнага асяроддзя экалагічныя актывісты.
Высадкай кампенсуецца частка высечанай лесапаласы. На думку Андрэя Бодзілева, каб цалкам аднавіць яе, патрэбныя 5-7 тысяч дрэў. Ён кажа, што найбольш эфектыўна паглынаюць хімічныя рэчывы хваёвыя пароды, таму менавіта іх актывісты раілі высаджваць камітэту аховы прыроды.
Пацвердзіць словы Бодзілева аб эфектыўнасці іглічных парод на месцы правядзення талакі не ўдалося. Спецыялісты камітэта выбар бярозы і клёну патлумачылі тым, што яны лепш прыжываюцца і растуць.
Жыхар Вейна: Думаць аб выратаванні трэба было, калі высякалі паўвекавыя дрэвы
Жыхары Вейна абвінавачваюць уладу, што яна дазволіла размяшчаць вытворчасці без уліку небяспекі. На іх думку, новыя пасадкі «калі і ўратуюць, то гадоў праз пяць, стаўшы дрэвамі».
«Думаць аб выратаванне трэба было тады, калі спілавалі лесапаласу. Ссеклі 50-гадовы лес за два месяцы, а цяпер прапаноўваюць чакаць, калі вырастуць саджанцы, дык гэта смешна. Можа нашы дзеці і ўнукі пацешацца», - сумна каментуе вясковец свой удзел у акцыі.
Мясцовыя жыхары кажуць, што на месцы, дзе цяпер размешчаныя хімічныя вытворчасці, быў высаджаны лес, як шчыт ад уздзеяння буйнога прадпрыемства «Хімвалакно». Лес высеклі пад пляцоўку №4 свабоднай эканамічнай зоны «Магілёў».
Высечаны сасновы абяцалі кампенсаваць ліставым лесам
Раней паміж пляцоўкай, на якой ўзведзены ці яшчэ ўзводзіцца дзясятак хімічных вытворчасцей, і паселішчамі была ахоўная лесапаласа, але яе істотна прарэдзілі, а месцамі цалкам высеклі.
Чыноўнікі сцвярджалі, што пад пілу пайшлі іглічныя дрэвы, пашкоджаныя жукамі караедамі. Дзялянкі абяцалі засадзіць ліставым лесам.
Занепакоенасць станам навакольнага асяроддзя абвастрылася, калі жыхары пасёлка Вейна зафіксавалі выкід у атмасферу вялікага аб'ёму сажы. Як яны сцвярджаюць, адбылося гэта ў ноч з 17 на 18 лістапада 2018 года.
Навакольнае асяроддзе забрудзіла прадпрыемства з расейскім капіталам «Омск Карбон Магілёў» падчас выпрабавальнага запуску вытворчасці тэхнічнага вугляроду.
Тады намеснік старшыні камітэта прыродных рэсурсаў Канстанцін Цеплякоў у пісьмовым адказе жыхарам паведаміў, што ў пасёлку выяўленае перавышэнне нарматыву цвёрдых часціц у 40 разоў. Пры нарматыве 17,01 мг/м³ фактычная колькасць гэтых часціц была 690,17 мг/м³.
Цяпер вейненцы з трывогай чакаюць запуску прадпрыемства. Паведамляецца, што гэта адбудзецца сёлета ў чацвёртым квартале.