20 сакавiка 2019, Серада, 6:58
Выклік для кожнага
Рубрыкі

Дэпутатка парламента Вугоршчыны: Пераезд штаб-кватэры банка МІБ у Будапешт - траянскі конь Пуціна

3
БУДЫНАК МІЖНАРОДНАГА ІНВЕСТЫЦЫЙНАГА БАНКА
ФОТА: АНАСТАСІЯ ДЗІЕВА / ТАСС

Маёмасць банка РФ будзе недатыкальная, на яго запрашэнне ў Вугоршчыну можа прыехаць хто заўгодна, адзначыла дэпутатка.

Дэпутатка парламента Вугоршчыны Зіта Гурмай заявіла, што Міжнародны інвестыцыйны банк, які плануе перанесці сваю штаб-кватэру з Масквы ў Будапешт, з'яўляецца «траянскім канём Пуціна», паведамляе РБК са спасылкай на вугорскае выданне Index.

Па ўмовах пагаднення з урадам Вугоршчыны банк мае права запрашаць у краіну любога чалавека. Няма ніякіх гарантый, сказала Гурмай, што такім чынам у Вугоршчыне не апынуцца «людзі, якія нясуць пагрозу для нацыянальнай бяспекі».

Гурмай адзначыла, што па велічыні актываў МІБ можа заняць 17-е месца ў нацыянальным банкаўскім сектары, аднак ніводная іншая фінансавая арганізацыя ў краіне не валодае такімі прывілеямі.

На сайце вугорскага парламента апублікаванае пагадненне паміж МІБ і ўрадам рэспублікі. Згодна з ім, штаб-кватэра ў Будапешце будзе вызваленая ад усіх падаткаў і збораў, а маёмасць і актывы атрымліваюць імунітэт ад канфіскацыі, арышту і экспрапрыяцыі. Вугорскія ўлады не змогуць зайсці на тэрыторыю банка без яго дазволу, і нават калі такі дазвол будзе дадзены, банк мае права ўсталёўваць умовы знаходжання на тэрыторыі.

МІБ мае права папрасіць ва ўрада Вугоршчыны забяспечыць сябе электрычнасцю, вадой, газам, стацыянарнай і мабільнай тэлефоннай сувяззю, інтэрнэтам, а таксама даць іншыя камунальныя паслугі. Паштовыя адпраўленні банка валодаюць такім жа імунітэтам, што і дыпламатычная пошта.

Акрамя таго, улады на запыт банка павінны забяспечыць бесперашкодны ўезд для любой асобы па-за залежнасці ад яе грамадзянства. Такімі ж прывілеямі банк карыстаецца ў Маскве.

У кастрычніку 2018 года кіраўнік МЗС Вугоршчыны Петэр Сійярта паводле вынікаў перамоў з расейскім калегам Сяргеем Лаўровым заявіў, што дасягнутае пагадненне аб пераводзе штаб-кватэры банка з Масквы ў Будапешт. Да гэтага ў вугорскай сталіцы размяшчаўся рэгіянальны офіс МІБ. Пра перанос штаб-кватэры папрасіў прэм'ер Віктар Орбан падчас перамоў з прэзідэнтам РФ Уладзімірам Пуціным у верасні 2018 года.