Пасля публікацыі ў незалежных СМІ рабочым з Гарадка выплацілі заробак за тры месяцы

Рабочыя ПМК-51 удзячныя СМІ за грамадскі рэзананс.

Добрыя навіны паведамілі «Віцебскаму кур'еру» рабочыя прадпрыемства ПМК-51 у Гарадку Віцебскай вобласці. Людзям, нарэшце, выплацілі завінавачанасць за заробак за снежань і студзень.

Нагадаем, што крыху больш за тыдзень назад сайт Charter97.org пісаў пра тое, што работнікі прадпрыемства не атрымлівалі заробленых грошай з лістапада.

Тады адзін з рабочых - Іван - распавядаў:

- У навінах казалі, што Лукашэнка загадаў падтрымаць будаўнікоў, падвысіць ім заробкі, каб спецыялісты не ехалі на заробкі ў Польшчу ці Расею. А ў нас аб падвышэнні і гаворкі не ідзе, хоць бы наогул нешта заплацілі. Апошнія грошы мы атрымлівалі ў лістападзе, а сёння - люты. З людзьмі рэгулярна размаўляюць дырэктар, прадстаўнікі мясцовай улады і прафзвязаў, распавядаюць пра цяжкую сітуацыю, просяць крыху пачакаць. А колькі чакаць?

На шчасце, дзякуючы грамадскаму рэзанансу, чакаць давялося нядоўга. Усяго праз некалькі дзён на прадпрыемстве правялі прыём намеснік генеральнага пракурора Рэспублікі Беларусь Аляксандр Дубаў, старшыня Гарадоцкага райвыканкама Пётр Карабач ды іншыя прадстаўнікі ўлады.

Людзям паабяцалі, што разлічацца з запазычанасцямі ў заробку бліжэйшым часам, а намеснік генеральнага пракурора абяцаў узяць гэтае пытанне на кантроль.

- Цуды! Па-іншаму не скажаш, - пракаментаваў Іван. - Мы, вядома, спадзяваліся, але што грошы выплацяць так аператыўна - не чакалі.