Усё, што вядома пра дэбаты Зяленскага - Парашэнкі на стадыёне

Зяленскі і Парашэнка ўпершыню за ўвесь час прэзідэнцкай гонкі сустрэнуцца публічна.

Выданне "Гордон" падрыхтавала кароткую інструкцыю, як трапіць на мерапрыемства, якія захады бяспекі будуць прынятыя, якія вуліцы сталіцы будуць перакрытыя і дзе можна будзе паглядзець дэбаты ў анлайн-рэжыме.

ДЗЕ, КАЛІ, У КОЛЬКІ?

Пераможцы першага тура прэзідэнцкіх выбараў - Уладзімір Зяленскі і Пятро Парашэнка - правядуць дэбаты на стадыёне «Алімпійскі» ў Кіеве 19 красавіка а 19.00. Стадыён разлічаны на 70 050 месцаў і знаходзіцца па адрасе вул. Вялікая Васількоўская, 55 (станцыя метро «Алімпійская»).

Строга кажучы, гэта не дэбаты ў юрыдычным сэнсе, а выступы кандыдатаў, бо фармат дэбатаў строга рэгламентуецца законам Украіны «Аб выбарах», дзе, між іншым, вылучаецца абмежаваны час на пытанні і адказы, а таксама пляцоўка правядзення - Нацыянальная грамадская тэлерадыёкампанія Украіны (НГТУ ). Які рэгламент узгоднены двума штабамі на стадыённых дэбатах і хто будзе вядоўцам - пакуль невядома.

Як патрапіць на стадыён?

Згодна з інфармацыяй кіраўніка праўлення НГТУ Зураба Аласанія, які прысутнічаў на нарадзе ў МУС з нагоды правядзення дэбатаў на «Алімпійскім», штаб Зяленскага і штаб Парашэнкі пакуль дамовіліся аб наступным:

будзе дзве сцэны;

трыбуны дзеляць не ўздоўж, а папярок;

сімволіку партый не выкарыстоўваюць;

артыстаў з песнямі запускаюць па чарзе;

квіткі палавіняць і распаўсюджваюць кожны свае.

Сваю частку квіткоў штаб Зяленскага пачаў бясплатна распаўсюджваць позна вечарам 16 красавіка праз сайт debaty2019.org.ua. «Браніруйце неадкладна! Атрымлівайце электронны білет на пошту. На аднаго чалавека можна зарэгістраваць толькі два бясплатных білета», - гаварылася ў паведамленні на афіцыйнай Facebook-старонцы «Каманда Зяленскага».

Праз некаторы час сайт завіс, а на афіцыйным інтэрнэт-рэсурсе Зяленскага з'явілася паведамленне: «Менш чым за паўдня пасля пачатку распаўсюджвання бясплатных квіткоў на дэбаты людзі забраніравалі 12 000 месцаў. Для білетнага сэрвісу гэта гістарычная нагрузка, таму ў яго працы магчымыя перабоі. Просім паставіцца да гэтага з разуменнем». На гэты момант замовіць квіткі ўжо немагчыма: «На жаль, усе квіткі ўжо прададзеныя. Дзякуй, што цікавіцеся мерапрыемствам!»

У штабе Парашэнкі ўсім ахвочым патрапіць на стадыён прапануюць прайсці папярэднюю рэгістрацыю і запоўніць анкету, у якой неабходна ўказаць імя, прозвішча, кантактны тэлефон і з якога рэгіёну будзеце дабірацца. «Для ахвочых падтрымаць нашага кандыдата будуць арганізаваны бясплатныя аўтобусы з рэгіёнаў», - гаворыцца на афіцыйнай Facebook-старонцы мерапрыемства, створанай штабам Парашэнкі.

ШТО НА РАЗАГРЭЎ?

Штаб Зяленскага паведамляе, што ўваход на стадыён «Алімпійскі» будзе адкрыты з 16.00, а праз гадзіну «пачатак праграмы перад галоўнай падзеяй краіны гэтай вясны».

У дзень распаўсюджвання білетаў на дэбаты Грамадзянская сець «Апора» паведаміла, што ў Галаванеўскім раёне Кіраваградскай вобласці прадстаўнікі Зяленскага прапаноўвалі бясплатна наведаць канцэрт на «Алімпійскім» з удзелам «папулярных зорак украінскай эстрады». У «Апоры» адзначылі, што сярод артыстаў, якія павінны выступіць на канцэрце, - Вольга Палякова і Dzidzio. Пазней і прадусар Паляковай, і прэс-служба Dzidzio зняпраўдзілі інфармацыю аб сваім выступе 19 красавіка ў Кіеве.

Рэдакцыя «Гордон» звязалася са штабам Зяленскага, але там паведамілі, што не могуць пакуль агучыць інфармацыю, што за праграма будзе перад пачаткам дэбатаў, і папрасілі дачакацца паведамленняў на сваіх афіцыйных рэсурсах.

Штаб Парашэнкі паведамляе, што ўваход на стадыён будзе адкрыты з 16.30 «паводле спісах і пасведчанняў асобы». Што плануе каманда дзейнага прэзідэнта ў прамежку паміж гэтым часам і пачаткам дэбатаў - невядома, са штабам Парашэнкі нашай рэдакцыі не ўдалося звязацца.

МЕРЫ БЯСПЕКІ

На паведамленне Нацыянальнай паліцыі, з 18 красавіка для забеспячэння парадку і бяспекі правядзення другога тура выбараў праваахоўнікі перайшлі на ўзмоцнены рэжым працы. Кіраўнік МУС Украіны Арсен Авакаў удакладніў, што, паводле папярэдніх звестак, на «Алімпійскі» прыбудзе да 60 тысяч гледачоў, а для забеспячэння грамадскага парадку на стадыёне прыцягнуць да 10 тысяч праваахоўнікаў.

«Гэтая сітуацыя досыць напружаная і патрабуе вялікай увагі да бяспекі. Акрамя таго, будзе запоўненая ўся фан-зона. Мы будзем бяспечна размяшчаць плыні людзей. Вядома, будзе праверка на металашукальнік і агляд. І я прашу ўсіх з разуменнем паставіцца да захадаў бяспекі», - падкрэсліў Авакаў.

Штаб Парашэнкі папрасіў сваіх прыхільнікаў не браць «атрыбутыкі спартыўных спаборніцтваў. Ніякіх фаераў, дудак, барабанаў і таму падобнага».

Дырэктар дэпартамента камунікацыі МУС Украіны Арцём Шаўчэнка ў эфіры аднаго з тэлеканалаў папрасіў усіх адказна паставіцца да захадаў бяспекі на «Алімпійскім»: «Калі ласка, усе, хто зможа і захоча туды прыйсці, ні ў якім разе не бярыце з сабой нічога, што можа быць выкарыстана як зброя, нават калі яно легальнае, да прыкладу газавыя балончыкі, нажы, кідальныя прадметы. Таксама нічога, што можа быць выкарыстана як піратэхніка».

Акрамя таго, у дзень правядзення дэбатаў з 10.00 да 22.00 будзе абмежаваны рух транспарту на вуліцах, прылеглых да стадыёна «Алімпійскі».

ДЗЕ БУДЗЕ ТРАНСЛЯЦЫЯ?

Большасць украінскіх тэлеканалаў ужо заявілі, што будуць трансляваць у жывым эфіры дэбаты на стадыёне. Акрамя таго, будзе прамая трансляцыя на YouTube-платформе.