На Нямізе пасля вялікага рамонту адкрылі вядомы «начнік» «Рублёўскі»

Як змяніўся вядомы «начнік?

У цэнтры Менска на праспекце Пераможцаў, 1 у падвальным памяшканні адкрыўся абноўлены «Рублёўскі». Tut.by паглядзеў, як змяніўся вядомы «начнік», і даведаўся, як будзе развівацца сетка.

Пасля куплі бізнэсоўцам Аляксандрам Машэнскім , крамы «Рублёўскі» ўваходзяць у групу кампаній «Санта». Рамонт на Нямізе - адпрацоўка новай канцэпцыі рэбрэндынгу для ўсіх «Рублёўскіх».

Крама адкрылася і пакуль будзе працаваць пад ранейшай шыльдай, зніжкавая сістэма для пакупнікоў таксама застанецца ранейшай. А вось канцэпцыя крамы - больш ад «Санты». Гэта першы пункт сеткі пасля рэбрэндынгу з новым гаспадаром.

Сярод навін у гэтай краме - піца, якую гатуюць на месцы амаль за шэсць рублёў, вітрына з мясам на грылі, кавамашына.

Змяніліся інтэр'ер і рух. З'явіліся вітрына з вагавой свежазамарожанай рыбай і халадзільнік з лінейкай пашыраных марскіх прадуктаў ад «Санта Брэмар». Кажуць, што тут будуць апошнія навінкі кампаніі, якіх у іншых сетках не знайсці.

Нягледзячы на гэта, «рыбны» профіль крамы аб'яднанай сеткі прысвойваць не спяшаюцца.

Генеральны дырэктар сеткі «Рублёўскі» Філіп Арцёменка (дагэтуль ён доўгі час быў топ-мэнэджарам у сетцы «Еўраопт») тлумачыць: хоць шыльда і старая, але крама - з новай канцэпцыяй.

- У нас стаіць задача - дашліфаваць яе да ідэальнага стану, улічыць пажаданні пакупнікоў, правесці рэнавацыю ўсёй сеткі. Няма ніякай важнасці ў тым, каб павесіць шыльду «Санты» - гэта зрабіць прасцей за ўсё. Важна падрыхтаваць аб'ект, каб пакупнікі ўбачылі і ацанілі якасныя змены.

Арцёменка кажа: пасля таго як канцэпцыя гэтай крамы будзе адпрацаваная, пачнуць абнаўляць і іншыя крамы сеткі. Тэрміны тэставання канцэпта пакуль не раскрываюць.

- Мы заяўлялі, што меркавана больш за 30 аб'ектаў сёлета мы ўвядзём у новым выглядзе. Пад якой шыльдай гэта будзе - яшчэ думаем, - кажа генеральны дырэктар.

Са слоў Арцёменкі, аддзяліцца ад нейкай сеткі - не асноўная мэта кампаніі. Новая канцэпцыя складваецца хутчэй з досведу «Санты», якая больш развітая ў рэгіёнах, і крамах «Рублёўскі».

Укладанні ў рэканструкцыю Арцёменка не называе, кажа толькі, што яны былі вялікімі, даволі значнымі і супастаўнымі з сумай на адкрыццё новага аб'екта.

- Ці можна сказаць, што аб'ект нанова пабудаваны ў існуючым будынку. Мы падыходзілі да ўсяго рупліва, але на дробязях не эканомілі. Надалі ўвагу катэгорыям свежых-тавараў, добра прадстаўленая зона садавіны, пашырана малочная і рыбная выкладкі, з'явіліся выпечка і кавамашыны. Як сетка, якая ўваходзіць ў буйны холдынг вытворцы прадуктаў харчавання, мы падтрымліваем гэтыя прадукты ў нас на паліцах, і яны супадаюць з пажаданнямі спажыўцоў. Акцэнт у нас зроблены на свежыя-катэгорыі.

У краме засталіся два выйсця, адзін з іх упрыгожаны літаграфіяй старога Менска і гісторыяй горада. Падвальныя вокны перакрытыя такімі ж гістарычнымі карцінамі. Залу не пашыралі, але зрабілі прастору больш камфортнай за кошт шырокіх праходаў паміж вітрынамі. У краме працуюць шэсць кас. На рамонт выдаткавалі месяц.

Гэтая крама ў цэнтры Менска будзе працаваць да гадзіны ночы.

У жніўні 2018 года група кампаній «Санта» бізнэсоўца Аляксандра Машэнскага набыла сетку крам «Рублёўскі». Сума ўгоды не выдаецца. У «Санту» ўваходзяць крамы пад гандлёвымі маркамі «Санта», «Санта&Фіш» і «Санта&Кэш». Асноўны рэгіён прысутнасці - Берасцейская вобласць. У складзе сеткі «Рублёўскі» працуюць 73 крамы, 53 з іх - у Менску. Пад двума брэндамі цяпер дзейнічаюць 158 раздробных крамаў, а агульная колькасць работнікаў складае блізу 6,8 тысячы чалавек.