«Яны там ёсць»: Пуцін распавёў пра ПВК у Сірыі

Правадыр Крамля ўпершыню прызнаў наяўнасць расейскіх вайскоўцаў-наймітаў у іншых краінах.

Прэзідэнт Расеі Уладзімір Пуцін пацвердзіў прысутнасць у Сірыі наймітаў з прыватных ахоўных кампаній, але адмовіў ім у статусе ўдзельнікаў баявых дзеянняў.

Так Пуцін адказаў на пытанне карэспандэнта Рускай службы ВВС Фарыды Рустамавай.

«З пачатку вайны ў Сірыі Расея таксама не прызнае гібель там наймітаў з прыватнай вайсковай кампаніі, якую звязваюць з Яўгенам Прыгожыным. У мінулым годзе нашы карэспандэнты сустрэліся з сем'ямі некалькіх загінулых так грамадзян. Іх сем'і просяць, каб хаця б пасмяротна ім давалі статус удзельнікаў баявых дзеянняў. У чым праблема ўшаноўваць і прызнаваць людзей, якія змагаліся ў інтарэсах дзяржавы?» - спытала Пуціна карэспандэнт ВВС.

«Што тычыцца прыватных ахоўных кампаній, пад эгідай якіх дзейнічаюць людзі, пра якіх вы згадалі, яны там сапраўды ёсць, - адказаў Пуцін. - Гэта не дзяржава расейская. І яны не з'яўляюцца ўдзельнікамі баявых дзеянняў, на жаль ці на шчасце».

Паводле ягоных слоў, у Сірыі ў ліку іншага разглядаюцца пытанні, звязаныя са здабычай нафты, засваеннем радовішчаў.

«Вядома, мы прызнаем, што, нават разглядаючы гэтыя народна-гаспадарчыя пытанні, людзі рызыкуюць жыццём, гэта таксама ўнёсак у барацьбу з тэрарызмам. Адбіваюць гэтыя радовішча у каго? У «ІДІЛаўца». Але гэта не расейская дзяржава і не расейскае войска. Таму мы тут нічога не каментуем», - сказаў Пуцін.

Карэспандэнт Расейскай службы ВВС Ілля Барабанаў:

- Уладзімір Пуцін фактычна ўпершыню прызнаў наяўнасць расейскіх наймітаў у Сірыі, хоць і абмовіўся, што уважае іх за супрацоўнікаў самых звычайных ахоўных структур.

З пачатку расейскай кампаніі ў Сірыі восенню 2015 года адтуль рэгулярна паступалі навіны аб гібелі байцоў ПВК «Вагнера», якую звязваюць з блізкім да Уладзіміра Пуціна бізнэсоўцам Яўгенам Прыгожыным. За гады вайны ў Сірыі там магло загінуць ад 200 да 400 наймітаў з Расеі.

Увесь гэты час на сем'і загінулых байцоў ціснулі прадстаўнікі ПВК, патрабуючы, каб яны ні ў якім разе не распавядалі аб тым, што здарылася журналістам. А суды адмаўлялі блізкім у пенсіях з прычыны страты карміцеля, б фармальна забітыя байцы ў Сірыі не знаходзіліся і высветліць іх статус немагчыма.

Ацаніць прававыя наступствы заявы Уладзіміра Пуціна пакуль складана, але як мінімум можна спадзявацца, што сем'і загінулых цяпер перастануць запалохваць, патрабуючы хаваць факт іх загубы, калі ўжо цяпер сам прэзідэнт прызнаў, што гэтыя людзі ў Сірыі ўсё ж ёсць.

Праца прыватных вайсковых кампаній у Расеі заканадаўча не ўрэгуляваная, а дзейнасць іх байцоў фармальна падпадае пад артыкул Крымінальнага кодэкса «найміцтва». Адсутнасць «ПВК Вагнера» у рэестры юрыдычных асоб дазваляе не прызнаваць страты, якія гэтае фармаванне нясе падчас выканання баявых задач у Сірыі і іншых «гарачых мясцінах». СМІ называюць Яўгена Прыгожына, з імем якога звязваюць «ПВК Вагнера», «поварам Пуціна».

Расейскія ветэранскія арганізацыі патрабавалі прызнаць адпраўку байцоў ПВК ў Сірыю і надаць легальны прававы статус дзейнасці прыватных вайсковых кампаній.

Расея пачала вайсковую аперацыю ў Сірыі ў верасні 2015 года. Міністэрства абароны нярэдка замоўчвае пра страты сярод расейскіх вайскоўцаў на тэрыторыі Сірыі. Абаронная ўтанова апошні раз афіцыйна прызнавала страты Расеі ў Сірыі ў сакавіку 2019 года. Тады ў міністэрстве паведамілі пра гібель траіх вайскоўцаў напярэдадні 23 лютага.

Усяго з пачатку аперацыі ў Сірыі ў верасні 2015 года Міністэрства абароны Расеі прызнала гібель там 108 вайскоўцаў. 41 вайсковец загінуў у першыя два гады аперацыі, пакуль у снежні 2017 года Уладзімір Пуцін не абвясціў аб вывадзе «значнай часткі» вайсковага кантынгенту, патлумачыўшы гэтую пастанову знішчэннем «найбольш баяздольнай групоўкі міжнародных тэрарыстаў». За мінулыя з гэтага моманту паўтара года Міністэрства абароны прызнала гібель яшчэ 70 чалавек.

Пры гэтым у верасні 2018 года старшыня камітэта Савета Федэрацыі ў абароне і бяспецы Віктар Бондараў заяўляў, што за тры гады аперацыі ў Сірыі загінулі 112 расейскіх вайскоўцаў.