Мядзведзеў - Румасу: Нарэшце-то пра «інтэграцыю» мы гаворым на адной мове

Да лістапада прэм'ер-міністры збіраюцца ўзгадніць усе «дарожныя карты».

Расея і Беларусь зблізілі пазіцыі, працуючы над актуалізацыяй Дамовы аб стварэнні «саюзнай» дзяржавы. Пра гэта прэм'ер-міністр Дзмітрый Мядзведзеў заявіў на перамовах з Сяргеем Румасам, якія прайшлі ў пашыраным складзе, паведамляе РИА Новости.

«Калегі <...> узмоцнена працавалі пасля 24 траўня - нашай сустрэчы ў Маскве ў пытаннях паглыблення інтэграцыі ў «саюзнай» дзяржаве, - сказаў прэм'ер РФ. - У працэнтах гэта ацэньваць складана, але тое, што пазіцыі збліжаюцца, гэта сапраўды так».

Мядзведзеў адзначыў, што за гэты час была праведзеная вялікая праца.

«Як мы з вамі і дамаўляліся, была зроблена работа па збліжэнні пазіцый, вы тады сказалі, што ў нас на 70% супадаюць пазіцыі, высока паднялі планку. Пасля гэтага мае таварышы па ўраду яе яшчэ вышэй задралі. У працэнтах гэта ацэньваць складана, але тое, што пазіцыі збліжаюцца, гэта, безумоўна, так. Я праводзіў нараду перад паездкай да вас. Нам трэба сёння прайсціся па ўсіх пытаннях, якія застаюцца. Там, дзе гэта будзе магчыма, прама цяпер вызначыцца, а нейкія пытанні адкласці на іншыя кансультацыі», - сказаў на заканчэнне расейскі прэм'ер, піша tut.by.

«Мы разумеем і чуем адзін аднаго»

Мядзведзеў заявіў, што Расея і Беларусь нарэшце «сталі гаварыць на адной мове», аднак шэраг пытанняў па-ранейшаму патрабуе даўзгаднення.

«Перамовы прайшлі добра: мы разумеем адзін аднаго, чуем адзін аднаго і абсалютна шчыра, не дзеля таго, каб выканаць дыпламатычны этыкет, скажу, што мы нарэшце-то адносна інтэграцыйнай тэматыкі гаворым на адной мове», - падкрэсліў Мядзведзеў. «Гэта не адразу атрымалася», - дадаў ён.

Са слоў прэм'ера, у дзвюх краін ёсць тры групы пытанняў, якія неабходна развязаць. У першую групу ён уключыў тыя, па якіх у Масквы і Менска аднолькавае разуменне сутнасці і тэрмінаў ўкаранення тых ці іншых рашэнняў. «Другая група - тыя пытанні, па якіх мы аднолькава ўспрымаем тыя ці іншыя развязанні ў сферы эканомікі, якія трэба прыняць, або ў сацыяльнай сферы, але дзе няма яшчэ дакладнага разумення, у які тэрмін іх рэалізоўваць, тут неабходныя даўзгадненні», - сказаў ён.

«І ёсць трэцяя катэгорыя, яна адносна невялікая, можа, нават зусім невялікая, па якой у сілу палітыка-юрыдычных прычын неабходна правесці дадатковыя кансультацыі», - сказаў прэм'ер. Мядзведзеў заўважыў, што праблемы з гэтай трэцяй катэгорыі маюць патрэбу ў абмеркаванні і на ўзроўні прэзідэнтаў. Ён не стаў тлумачыць, якія пытанні да якой катэгорыі належаць, заўважыўшы толькі, што кола праблем звязанае з падатковай, бюджэтнай, сацыяльнай, фінансава-крэдытнай палітыкай.

«Да лістапада ўзгоднім усе «дарожныя карты»

Сяргей Румас, у сваю чаргу, паведаміў, што да лістапада павінны быць узгодненыя «дарожныя карты» па ўсіх сектарах эканомікі.

Румас сказаў, што затым спатрэбіцца вялікая праца ўрадаў «па прывядзенню заканадаўства ў адпаведнасць для таго, каб агульныя рынкі, агульныя сектаральныя рынкі маглі ужо зарабіць на поўную моц». «Калі мы гаворым пра агульныя або нават у некаторых сектарах адзіны рынак, то разумеем, што гэта роўныя ўмовы для нашых суб'ектаў гаспадарання. І не важна: яны зарэгістраваныя ў Расейскай Федэрацыі або ў Рэспубліцы Беларусь», - сказаў кіраўнік беларускага ўрада.

Румас растлумачыў, што роўныя ўмовы гаспадарання прадугледжваюць «аднолькавае іх падаткаабкладанне, і элементы бюджэтнай палітыкі, і роўныя кошты на энэрганосьбіты, і роўныя рэгулятарныя правілы». «У канчатковым выніку гэта з'яўляецца канчатковай мэтай інтэграцыі», - заявіў ён.

«Праца над «саюзнай» дамовай Беларусі і Расеі завершыцца толькі тады, калі мы зменім незваротным чынам наша заканадаўства», - падсумаваў Дзмітрый Мядзведзеў.