Трамп прыляціць у Польшчу яшчэ сёлета

Пра гэта паведаміў кіраўнік канцылярыі прэзідэнта Польшчы.

Візіт прэзідэнта ЗША Дональда Трампа быў адкладзены, а не скасаваны і адбудзецца яшчэ сёлета, - сказаў кіраўнік польскай прэзідэнцкай канцылярыі Кшыштаф Шчэрскі, паведамляе «Радио Польша».

Ён таксама выказаў надзею, што новая дата візіту Дональда Трампа ў Польшчы будзе вядомая на наступным тыдні.

Прэзідэнт ЗША павінен быў прыбыць у Польшчу на мерапрыемствы з нагоды 80-й гадавіны пачатку Другой сусветнай вайны. Амерыканскі лідар адклаў візіт у сувязі з ураганам «Дарыян», які насоўваецца на Фларыду. Замест яго ў Польшчу прыляціць віцэ-прэзідэнт ЗША Майк Пенс, які ў нядзелю, 1 верасня, выступіць з прамовай на плошчы Пілсудскага ў Варшаве ў рамках мерапрыемстваў.

Кшыштаф Шчэрскі на прэс-канферэнцыі паведаміў, што падчас гутаркі з дарадцам прэзідэнта ЗША ў нацыянальнай бяспецы Джонам Болтанам прагучала дакладная заява, што візіт прэзідэнта Трампа ў Польшчу адкладзены, а не скасаваны.

«Прэзідэнт Трамп мае намер яшчэ сёлета, у найбліжэйшыя месяцы наведаць Варшаву, каб рэалізаваць поўны план свайго візіту, які быў складзены на 2 верасня, а таксама падпісаць ужо падрыхтаваныя дакументы», - сказаў кіраўнік канцылярыі прэзідэнта Польшчы Кшыштаф Шчэрскі.

З ягоных слоў, польскі бок падаў амерыканскаму боку некалькі магчымых тэрмінаў візіту прэзідэнта Трампа, усе гэтыя тэрміны ахопліваюць найбліжэйшыя тры месяцы.