Эксперт: Дэвальвацыя можа быць у найбліжэйшы час

Эканамісты заўважылі кардынальную змену ў настроях Лукашэнкі.

У найбліжэйшай будучыні не выключаная накіраваная дэвальвацыя беларускага рубля.

Верагоднасць такога развіцця падзей вырасла пасля нарады Аляксандра Лукашэнкі з урадам 19 верасня, на якой абмяркоўваліся пытанні эканамічнага развіцця краіны, піша эксперт Уладзімір Тарасаў на сайце «Белрынак».

На ёй кіраўнік чарговы раз папярэдзіў урад, што ўсе планы на гэты год павінны быць рэалізаваныя. Ён нават прыгразіў ураду звальненнем: «Не будуць выкананыя параметры развіцця на 2019 г., усе адказныя – ад прэм'ер-міністра – пойдзеце на супакой. Я вас папярэджваў летась у гэты час, калі рабілі планы на 2019 г.».

Лукашэнка таксама паведаміў, што яго насцярожвае, што эканамічны рост у краіне не толькі сціплы, але і вельмі няўстойлівы. Відаць, ён меў на ўвазе зніжэнне тэмпаў росту ВУП паводле вынікаў студзеня – жніўня да 1,1% з 1,3% паводле вынікаў студзеня – ліпеня. Але гэтыя велічыні агучаныя не былі, відаць, каб не палохаць насельніцтва.

І, нарэшце, Лукашэнка сказаў самае галоўнае: «Мы не можам заняць пазіцыю іншых назіральнікаў і здавольвацца збалансаванасцю. Выдуманай, прапісанай на паперы. Людзі, давяраючы падчас рознага роду, у тым ліку палітычных, кампаній, не за гэта галасавалі і не гэтага ад нас патрабуюць».

Гэтыя словы азначаюць магчымую кардынальную змену ў настроях Лукашэнкі, які раней падтрымліваў жорсткую грашовую палітыку ўрада і Нацбанка, накіраваную на забеспячэнне стабільнасці фінансаў на шкоду эканамічнаму росту.

Такім чынам, ва ўрада і Нацбанка з'явіўся стымул для змякчэння сваёй палітыкі, то-бок паскоранага зніжэння стаўкі рэфінансавання, павелічэння бюджэтных выдаткаў і паслаблення беларускага рубля. Вядома, пойдуць яны на гэта ці абяруць праверыць, ці выканае Лукашэнка абяцанне звальнення ў выпадку невыканання паказніка росту ВУП на 4%, невядома. Але шанцы на паслабленне ёсць, а гэта азначае магчымае зніжэнне курсу беларускага рубля.

Гэтаму павінны спрыяць і больш напружаныя планы на 2020 год, якія запатрабаваў вызначыць кіраўнік, вярнуўшы праекты фінансавых дакументаў на 2020 год на дапрацоўку.