«Абяцалі стадыён і басэйн, а будуюць толькі новыя дамы»

Жыхары Фаніпаля ўзбунтаваліся супраць ушчыльнення.

Нягледзячы на гучныя словы і абяцанні нечуванага росквіту, гарады-спадарожнікі ўсё яшчэ смела можна называць гаротнымі: рывок за апошнія пяць гадоў не адбыўся, у самім жа абліччы гарадоў змянілася толькі жылы складнік - тут і там выраслі панэльныя шматпавярховікі, піша «Онлайнер».

Змагацца з сітуацыяй надумалі жыхары Фаніпаля, якія шчыра абураныя тым, што замест сацыяльнай інфраструктуры ў іх родным горадзе зноў збіраюцца ляпіць дамы (на двух пляцах прыватны забудоўшчык плануе пабудаваць пяць шматпавярховікаў). Першым крокам у супрацьстаянні стала петыцыя, якая зусім хутка адправіцца ў Дзяржынскі райвыканкам. Журналісты падаюць яе ў скарачэнні.

- Агрэсіўнае ўшчыльненне існай забудовы адбываецца без стварэння адпаведнай інфраструктуры, пры адсутнасці рэзервовых тэхнічных магутнасцяў для вода-, газа- і электразабеспячэння. Перадача зямлі праектаванага надзелу №2 (32.19-АПК) пад ўшчыльняльнае будаўніцтва шматкватэрных дамоў нерацыянальная, бо гэтую зямлю можна выкарыстоўваць для будаўніцтва спартыўных аб'ектаў, даўно абяцаных, стадыёна і басэйна, дадатковых збудаванняў для школы №1 г. Фаніпаль, у якіх жыхары маюць вострую патрэбу. Адзіная школа і гімназія ўжо не спраўляюцца з ростам з году у год колькасці вучняў. Дзіцячыя садкі таксама перапоўненыя.

У выніку ўшчыльняльнага будаўніцтва праектаванага надзела №1 (33.19-АПК) будзе праведзена высечка шматгадовай лесапаласы, наўзамен якой плануюцца два дзесяціпавярховы двухсекцыйныя жылыя дамы і шматлікія парковачныя месцы. Замест прывядзення ў парадак і акультурвання зялёную зону збіраюцца закатаць у асфальт і пабудаваць дамы ўшчыльную адзін да аднаго.

Хочам адзначыць той факт, што ў Фаніпалі няма ніводнага нармальнага парку, а тэрыторыя існага сквера ў цэнтры была калісьці канфіскаваная, з нашых звестак, у дзіцячага сада №1.

Будаўніцтва прывядзе да знішчэння зарэзерваванага месца пад пляцоўку для выгулу сабак, у якім таксама востра мае патрэбу горад. Напрыканцы петыцыі гараджане просяць:

- прыпыніць ушчыльняльную забудову ў цэнтры горада;

- надаць большую ўвагу развіццю інфраструктуры Фаніпаля, асабліва:

рамонту і добраўпарадкаванню дарог, ходнікаў, унутрыдваровых тэрыторый і гарадской лесапаласы;

вяртанню ў горад уласнай ЖКГ;

будаўніцтве школы, стадыёна, басэйна і лякарні;

стварэнне абгароджаных тэрыторый для выгулу сабак і устаноўкай спецыяльных трэнажораў для іх дрэсуры;

запуску доўгачаканага дзяржаўнага аўтобуснага маршруту паміж Фаніпалем і Менскам.