Бэльгія прыпыніла працэдуру экстрадыцыі Пучдэмона ў Гішпанію
- 2.01.2020, 20:22
- 8,200
Пучдэмон у чэрвені 2019 года быў абраны ў Еўрапарламент
Бэльгія пакуль не будзе экстрадаваць у Гішпанію Карлеса Пучдэмона. Суд у Брусэлі прыняў пастаову прыпыніць працэдуру выдачы да таго часу, пакуль Еўрапейскі парламент не пазбавіць Пучдэмона і ягонага паплечніка Тоні Каміна дэпутацкага імунітэту, паведаміў у чацвер, 2 студзеня, адвакат абодвух палітыкаў Сымон Бэкерт, паведамляе DW.
Пучдэмон і Камін у чэрвені 2019 году былі абраныя ў Еўрапарламент, аднак не змаглі прыступіць да выканання сваіх абавязкаў, бо гэтаму перашкаджае Гішпанія. Заканадаўства Гішпаніі патрабуе прысягі на канстытуцыі, каб дэпутацкі мандат пачаў дзейнічаць. Для гэтага палітыкі павінны вярнуцца ў краіну, дзе ім пагражае арышт.
Пучдэмон уцёк у Бэльгію ў 2017 годзе, каб пазбегнуць судовага пераследу пасля няўдалай спробы абвясціць аб незалежнасці Каталоніі ад Мадрыда. У кастрычніку 2019 года Вярхоўны суд Гішпаніі другім разам выдаў міжнародны ордэр на арышт былога кіраўніка адміністрацыі Каталоніі. Падставай для ягонага арышту сталі абвінавачванні ў падбухторванні да паўстання і растраце дзяржаўных сродкаў.