Лукашэнка: Барані Бог, якія цяжкія часы, нам спатрэбіцца камсамол

Дыктатар зноў загаварыў пра «цяжкія часы».

Аляксандр Лукашэнка выказаўся пра ролю Федэрацыі прафсаюзаў Беларусі ў палітычных кампаніях. У панядзелак правадыр дзяржавы сустрэўся з яе старшынём Міхаілам Ордам.

«Аснову складаюць людзі, якія працуюць, працуюць, а не займаюцца палітыканствам, хаджэннем па чыстых і ўтульных менскіх вуліцах», - цытуе словы Лукашэнкі ягоная прэс-служба.

На канец лютага 2020 года запланаваны з'езд ФПБ, і Лукашэнка даручыў ураду, сваёй адміністрацыі далучыцца да яго падрыхтоўкі, каб ён прайшоў «годна, прыгожа». «Пасля сённяшняй прамовы пачнуць вінаваціць прафсаюзы, што яны ўжо партыяй сталі і ці ледзь не галоўную ролю адыгрываюць у палітычным працэсе», - сказаў Лукашэнка Орду.

«Барані Бог, якія цяжкія часы, нам спатрэбяцца і прафсаюзы, і камсамол (па-старому кажучы) - наша моладзевая арганізацыя, усе арганізацыі будуць задзейнічаны, - працягвае Лукашэнка. - Не дай Бог, вядома, гэтых цяжкіх часоў».