Чаму ЗША хочуць абмежаваць уезд грамадзянам Беларусі?
50- 22.01.2020, 13:17
- 68,013
Абмежаванні могуць закрануць таксама выдачe грын-карт.
ЗША плануе ўвесці новыя абмежаванні на візы для падарожнікаў і імігрантаў, паведамляе «Еўрарадыё». У «чорны спіс» патрапілі Эрытрэя, Кыргызстан, М'янма, Нігерыя, Судан, Танзанія і... Беларусь!
Што аб'ядноўвае нас з гэтымі краінамі?
Канкрэтна да Беларусі Белы дом прэтэнзій не выстаўляе. Аднак вядомыя прынцыпы, паводле якіх фармуецца спіс: невыкананне патрабаванняў бяспекі, адсутнасць біяметрычных звестак, недастаткова інтэнсіўны абмен інфармацыяй з ЗША і недастатковыя захады для барацьбу з тэрарызмам.
Першапачаткова краіны, у дачыненні да якіх Трамп увёў візавыя санкцыі, мелі яшчэ адную адметнасць: у іх пераважалі мусульмане. Аднак пасля абвінавачванняў у рэлігійнай нецярпімасці спіс падкарэктавалі. А ў новых кандыдатах на візавыя абмежаванні мусульмане не складаюць большасць.
Яшчэ адзін крытэрый - колькасць пратэрмінаваных віз. Са звестак Міністэрства ўнутранай бяспекі ЗША, у 2018 годзе болей прадугледжанага тэрміну заставаліся ў краіне 24% эрытрэйцаў, 15% нігерыйца і 12% грамадзян Судана. Пра беларусаў такой статыстыкі няма.
Дык няўжо грамадзянам Беларусі забароняць атрымліваць амерыканскія візы?
Не зусім. Прадстаўнікі адміністрацыі прэзідэнта ЗША заявілі, што грамадзяне краін, уключаных у «спіс Трампа», не абавязкова сутыкнуцца з агульнай забаронай на паездкі ў ЗША. Забарона можа быць частковай. Гэта значыць, беларусам могуць абмежаваць выдачу пэўных тыпаў віз. Напрыклад, бізнэс або гасцявых. Абмежаванні могуць закрануць таксама выдачы грын-карт. Пра гэта паведамляе Wall Street Journal.
Што да грын-карт. Дональд Трамп заклікаў у прынцыпе спыніць гэтую праграму, заявіўшы, што яна дазваляе непажаданым людзям уязджаць у ЗША. Ён прапанаваў замест гэтага пераарыентаваць існую візавую сістэму на кваліфікаваных работнікаў.
А хто ўжо ў «чорным спісе»?
Кампанія слаўная. Цяпер абмежаванні дзейнічаюць для грамадзян Ірана, Лібіі, Самалі, Сірыі, Емена і Паўночнай Карэі, а таксама для палітычных чыноўнікаў з Венесуэлы.
Гэтыя абмежаванні - назаўжды?
Не. Але адзіная краіна, якую спачатку ўключылі ў «чорны спіс», а потым прыбралі з яго, - гэта Чад. Ён быў у самым першым у спісе і пакінуў яго ў красавіку 2018 года.
Грамадзяне краін, занесеных у спіс, могуць у індывідуальным парадку намагаць на атрыманні амерыканскай візы. Але паспяховых прэцэдэнтаў пакуль не было.
Пакуль Дональд Трамп застаецца прэзідэнтам ЗША, спіс наўрад ці скасуюць цалкам. Прадстаўнік Белага дома Хоган Гідлі ў каментары для New York Times распавёў, што адміністрацыя прэзідэнта ЗША ўважае забарону «надзвычай паспяховай» у абароне амерыканскіх інтарэсаў.
Ён адзначыў, што АП не планавала ніякіх заяў, якія тычацца забароны.
«Здаровы сэнс і нацыянальная бяспека дыктуюць, што, калі краіна хоча ў поўнай меры ўдзельнічаць у іміграцыйных праграмах ЗША, яна таксама павінна выконваць усе меры бяспекі і барацьбы з тэрарызмам, - сказаў Гідлі. - Мы не хочам імпартаваць тэрарызм або ўсялякую іншую пагрозу нацыянальнай бяспекі ў Злучаныя Штаты».