Улады прапануюць беларусам налягаць на хлеб і бульбу

У спажывецкім кошыку ўрэзалі колькасць мяса.

Міністэрства працы і сацыяльнай абароны перагледзела спіс тавараў і паслуг, якія ўваходзяць у мінімальны спажывецкі кошык. Пра гэта гаворыцца ў яго пастанове №2 ад 10 студзеня 2020 года. Tut.by паглядзеў, як змяніўся набор прадуктаў, прамтавараў і паслуг, які, на думку чыноўнікаў, павінен задавальняць асноўныя фізіялагічныя, сацыяльныя і культурныя патрэбы чалавека.

Нагадаем, мінімальны спажывецкі кошык - гэта набор тавараў і паслуг першай неабходнасці, вызначаны заканадаўствам на пэўны тэрмін. У яго ўваходзяць прадукты, адзенне, абутак, лекі, сродкі асабістай гігіены, мэбля, транспарт, сувязь, камунальныя паслугі і іншае.

Зыходзячы з гэтага набору ўстанаўліваецца мінімальны спажывецкі бюджэт-сума, якой павінна выстарчыць на яго куплю. Мінімальны спажывецкі бюджэт у Беларусі зацвярджаецца раз на тры месяцы і грунтуецца на коштах апошняга.

Для людзей рознага ўзросту і сацыяльнага статусу спажывецкі кошык адрозніваецца, бо і патрэбы ў іх розныя. Размеркаванне ідзе па 6 сацыяльна-дэмаграфічных катэгорыях і 2 тыпах сем'яў розных саставаў.

Журналісты паглядзелі, як змяніўся набор тавараў і паслуг для сям'і з 4 чалавек.

Наборы тут разлічаныя для мужчыны і жанчыны ва ўзросце ад 18 гадоў і да пенсійнага ўзросту, хлопчыка 13 і дзяўчынкі 7 гадоў. Чыноўнікі перагледзелі гадавыя нормы спажывання прадуктаў, яны змяніліся як у большы, так і ў меншы бок. Да прыкладу, для жанчын павялічылі колькасць жытняга і пшанічнага хлеба. Норма ў першым была 58,4 кілаграма, стала 60,2, гэта значыць, плюс 1,8 кіло. Другога на год адводзілася 38,3 кіло, а цяпер 40,2. Стала больш на 1,9 кіло. Мужчынам таксама дадалі 1,9 кіло жытняга хлеба, да 74,9.

Дарослым цяпер адводзяць больш круп-аўсянкі, грэчкі, проса і панцаку. Мужчынам агулам на 750 грамаў кожнай, жанчынам на 400.

Усім чацвярым сямейнікам адвялі на год больш бульбы. Здзівіла, што дзяўчынцы 7 гадоў пакладзена 98,6 кілаграма. Гэта больш за два стандартныя мяхі. Для ўсіх выраслі нормы спажывання яек. Цяпер мужчыны могуць з'есці 287,3 яйка за год, жанчыны - 233, хлопчыкі - 365, а дзяўчынкі - 209,7.

Амаль усім зрэзалі колькасць мяса і каўбасы. Павялічылі норму ялавічыны мужчынам на 200 грамаў за год, хлопчыкам - каўбасы і свініны, дзяўчынкам — свініны.

Для дарослых моцна вырасла норма спажывання садавіны, амаль на 10 кіло - да 51,1 кілаграма. Таксама ў кошык паклалі больш сухафруктаў і кандытарскіх вырабаў. Толькі дзяўчынкам сямі гадоў можна есці па-ранейшаму 7,3 кіло сухафруктаў і на 500 грамаў менш прысмакаў - 8,6 кілаграма.

У спажывецкіх кошыках дарослых усё яшчэ прысутнічае маргарын, і яго там больш за кілаграм на год.

Змены адбыліся і па частцы адзення. Але не ў плане яе колькасці. Тут усё засталося нязменным. Затое дзецям скарацілі тэрмін выкарыстання многіх прадметаў гардэроба. Да прыкладу, раней, на думку Мінпрацы, дзяўчынка 7 гадоў павінна была насіць 2 начныя кашулі або піжамы 3 гады. Цяпер усяго 1,5 года. У хлопчыка павінны былі быць адны штаны на 2 гады. Цяпер у мінімальны спажывецкі бюджэт заклалі іх куплю на кожны год. Скарацілі і тэрмін выкарыстання красовак для дзяўчынак: раней быў 2 гады, цяпер стаў 1 год. Здзівіла, што і раней, і цяпер для жанчын у спажывецкім кошыку не прадугледжаныя штаны.

Трохі памяняўся набор лекаў, прадметаў санітарыі і гігіены для сям'і з 4 чалавек. Цяпер за год можна набыць 3 літры вадкіх мыйных сродкаў, а не два. А замест 12 кіло пральнага парашка цэлых 16. З гэтага спісу выключылі адбельвальнікі, сродкі для ачысткі, плямавыводнікі, а таксама сродкі супраць бытавых насякомых. Цяпер гэта тавары не першай неабходнасці.

У наборы мэблі, прадметаў культурна-бытавога і гаспадарчага прызначэння знікла пара пазіцый. Некаторыя замянілі на іншыя. Скажам, замест шафы для посуду і кухоннай паліцы цяпер у спісе кухонны гарнітур - адзін на 20 гадоў. З пераліку прыбралі радыёпрымач. Затое замест адной графы «Канцылярскія тавары» з'явіўся спіс з 23 пазіцый з асадкамі, гумкамі, алоўкамі, нажніцамі, сшыткамі, каляровай паперай і іншым. І ўказаннем, чаго і колькі закладзена ў бюджэт на год.

Са спісу неабходных сям'і паслуг прыбралі 360 хвілін міжгародніх тэлефонных размоў. А ў пералік камунальных паслуг нарэшце ўключылі тэхабслугоўванне ліфта, электраэнэргію на яго працу, на асвятленне і ўборку пад'езда. Варта адзначыць, што ўсе гэтыя паслугі надаваліся і раней, але ў кошыку з'явіліся толькі цяпер.

Цяпер мінімальны спажывецкі бюджэт складае:

для працаздольнага насельніцтва - 475,56 рубля,

для пенсіянераў - 371,51 рубля,

для студэнтаў - 351,9 рубля,

для дзяцей ва ўзросце да трох гадоў - 301,8 рубля,

для дзяцей ва ўзросце ад трох да шасці гадоў - 398,68 рубля,

для дзяцей ва ўзросце ад шасці да васемнаццаці гадоў - 405,17 рубля,

для сям'і з чатырох чалавек - 372,6 рубля на аднаго сямейніка,

для маладой сям'і з трох чалавек - 405,25 рубля на аднаго сямейніка.